Цахим орчинд Looksmaxxer нэрээрээ танигдсан, маргаантай контент бүтээгч Клавэклэр аюултай туршилт хийж байгаад ухаан алдаж, бие нь хүчтэй таталт өгсөн аймшигтай үйл явдал боллоо. Kick платформын хамгийн алдартай стриймэрүүдийн нэг болоод буй тэрээр өөрийн гадаад үзэмжийг сайжруулах хачирхалтай аргуудаараа хэдэн арван мянган үзэгчдийг тогтмол цуглуулдаг нэгэн юм.
Өнгөрсөн шөнийн шууд дамжуулалтын үеэр тэрээр UFC-ийн шилдэг тулаанч Арман Царукяныг урьж, бие махбодийн чадамжийн талаар ярилцжээ. Энэ үеэр түүний нэг найз нь өөрийн хүсэлтээр Царукянаар хүзүүндээ боолт хийлгэж, ухаан алдах туршилт хийлгэсэн нь үзэгчдийг цочирдуулсан юм. Гэвч үйл явдал үүгээр дууссангүй, Клавэклэр өөрөө уг аюултай туршилтыг биеэрээ үзэхээр шийджээ.
Тэрээр найздаа ямар ч эсэргүүцэл үзүүлэхгүйгээр араас нь боож, бүрэн ухаан алдуулахыг зөвшөөрсөн байна. Клавэклэр ухаан алдах үед найзууд нь хөлийг нь өргөж, тархины цусны эргэлтийг сэргээх гэж оролдсон боловч тэрээр маш аймшигтайгаар бие нь бүхэлдээ татаж эхэлжээ. Аз болоход тэрээр удалгүй ухаан орсон бөгөөд болсон явдалд тийм ч их цочирдоогүй, харин ч гайхширсан байдалтай байв.
Бодит нэр нь Брэйден Петерс болох уг стриймэр энэхүү туршилтын аюул заналаас огтхон ч эмээхгүй байгаа бололтой. Тэрээр өөрийн сошиал хуудаснаа “Хүн бүр намайг үзэн ядаж байгаа ч миний таамаглаж байснаар энэ бичлэг маш хурдан тархлаа” хэмээн бичжээ. Уг бичлэг нийтлэгдсэнээсээ хойш хэдхэн цагийн дотор 14.6 сая гаруй хандалт аваад байна. Клавэклэр өмнө нь өөрийгөө хамгаалах урлаг сурахын ач холбогдлыг үгүйсгэж байсан ч сүүлийн үед Арман Царукян, Райан Гарсиа зэрэг мэргэжлийн тулаанчидтай хамтран контент бүтээх болсон юм.
