Хоёрдугаар сард Атланта Хокс багаас Голдэн Стэйт Уорриорс багт нэгдсэн Кристапс Порзингис шинэ багтаа дажгүй байгаа ч ирээдүйн карьераа хараахан эцэслэн шийдээгүй байгаагаа илэрхийллээ. Тэрбээр Сан Франциско хотод ирснээсээ хойш тоглолтын хэмнэлээ олж, эрүүл мэндийн хувьд эерэг өөрчлөлтүүд мэдэрч байгаа ч гэрээний асуудалд нухацтай хандаж байна.
Порзингис одоогоор Бостон Сэлтикс багтай байгуулсан хоёр жилийн 60 сая ам.долларын гэрээнийхээ сүүлийн жилдээ яваа юм. Тэрбээр ирээдүйнхээ талаар ярихдаа, “Энд үргэлжлүүлэн тоглох хүсэл байгаа ч энэ жил би өөрийн чадварынхаа өчүүхэн хэсгийг л харууллаа. Тиймээс эхлээд юу боломжтойг харах хэрэгтэй” хэмээн нууцлаг хариулт өгчээ. Уорриорсын бүрэлдэхүүнд 12 тоглолтод оролцохдоо тэрбээр дунджаар 17.5 оноо, 4.8 самбар, 2.4 дамжуулалт гүйцэтгээд байна.
Түүний тоглолтод бэртэл гэмтлээс гадна POTS (Postural Orthostatic Tachycardia Syndrome) буюу зүрхний цохилт түргэсэх хам шинж нөлөөлж байсныг тэрбээр хүлээн зөвшөөрсөн юм. Үүнээс болон хоёр долоо хоног завсарласны эцэст гуравдугаар сарын 7-ноос талбайд эргэн ирсэн бөгөөд одоогоор биеийн ачааллаа тэнцвэржүүлэх үүднээс дараалсан тоглолтуудад (back-to-back) оролцохгүй байгаа аж.
Порзингисын хувьд багийн супер од Стефен Карритай хамт талбайд гарахыг тэсэн ядан хүлээж байна. “Стеф бол хамгаалагчдын анхаарлыг маш их татдаг тоглогч тул бусдын ажлыг хөнгөвчлөх нь тодорхой. Бид хамтдаа сайн зохицож чадна гэдэгт итгэлтэй байна” гэж тэрбээр онцолжээ. Багийн анд Ги Сантос ч мөн тэдний хослолыг лигийн аль ч баг зогсооход бэрх байна гэдэгт итгэлтэй байгаагаа хуваалцсан юм.
Эцэст нь Порзингис шийдвэр гаргахад нь багийн дотоод уур амьсгал, удирдлага болон эрүүл мэндийн албаны тусламж чухал үүрэг гүйцэтгэхийг дурдлаа. Тэрбээр багийн эрүүл мэнд, ашиг тусын дэд ерөнхийлөгч Рик Селебринигийн удирдлага дор байгаадаа сэтгэл хангалуун байгаа бөгөөд эрүүл байх нь түүний дараагийн алхмыг тодорхойлох гол хүчин зүйл болох ажээ.
