NBA-ийн Вашингтон Визардс баг дөрөвдүгээр сарын 1-ний Инээдмийн баярт зориулсан үзүүлбэр нь хэрээс хэтэрч, олон нийтийн шүүмжлэлд өртсөний улмаас албан ёсоор уучлалт гуйлаа. Тус баг Филаделфиа 76ерс багтай хийсэн тоглолтын завсарлагаар нэгэн үзэгч талбайн төвөөс шидэлт гүйцэтгэж, 10,000 ам.долларын шагнал хожсон мэт жүжигчилсэн үзүүлбэр үзүүлсэн юм.
Гэвч хожим нь уг “азтай үзэгч” болон түүний эргэн тойронд байсан хүмүүс нь бүгд багийн зохион байгуулалттайгаар бэлтгэсэн жүжигчид болох нь тодорхой болжээ. Monumental Basketball-ийн төлөөлөгчийн мэдээлснээр, уг арга хэмжээнд оролцсон хүмүүс нь тус компанийн ажилчдын найз нөхөд байсан бөгөөд бүх үйл явдал урьдчилан бэлтгэсэн зохиолын дагуу явагдсан байна.
Визардс багийн зүгээс гаргасан мэдэгдэлдээ: “Өчигдөр оройн тоглолтын үеэрх үзүүлбэр маань үзэгчдийг төөрөгдүүлж, таагүй сэтгэгдэл төрүүлсэн бол бид хүлцэл өчиж байна. Энэ нь зөвхөн баярын өдөрт зориулсан тусгайлан бэлтгэсэн жүжиг байсан ч бид үзэгчдийн хүлээлтийг дутуу үнэлж алдаа гаргалаа. Манай дэмжигчид бидний хувьд хамгийн чухал бөгөөд бид үргэлж эерэг туршлага өгөхийг эрмэлздэг” хэмээн өгүүлжээ.
Уг тоглолтод Визардс баг 153-131 харьцаатайгаар Филаделфиа багт ялагдсан бөгөөд талбай дээрх хожигдлоос гадна талбайн гаднах энэхүү “бүтэлгүй” тоглоом нь багийн нэр хүндэд сөргөөр нөлөөлөөд байна. Спортын ертөнцөд үзэгчдийн итгэл үнэмшлээр тоглох нь хэзээд эрсдэлтэй алхам байдгийг энэхүү үйл явдал дахин санууллаа.
Дэлгэрэнгүй эх сурвалжийг харах
