Холимог тулааны домогт тамирчин Ронда Раузи бараг арван жилийн дараа ММА-д эргэн ирж, ирэх сард болох “MVP MMA 1” эвентийн гол тулаанд Жина Каранотой учраа таарахаар болжээ. Тулааны өмнөх хэвлэлийн бага хурал болон өөрийн YouTube сувгаар дамжуулан тэрээр UFC-ийн өнөөгийн нөхцөл байдлыг хатуу шүүмжилсэн байна. Раузи хэлэхдээ, UFC анх байгуулагдахдаа тогтсон тогтолцооны эсрэг, тулаанчдын талд байсан бол одоо өөрөө хэтэрхий нүсэр, хөшингө “эстаблишмент” буюу ноёрхогч систем болон хувирч, спортын хөгжлийг удаашруулж байна гэж үзэж байна.
Тэрээр UFC-ийг тулаанчдад олгодог гэрээний нөхцөлөө “авбал ав, үгүй бол боль” гэсэн тулган шаардах хэлбэрт шилжүүлж, тамирчдын үнэ цэнийг үл ойшоож байгааг онцолжээ. Раузигийн үзэж буйгаар, тус байгууллага өмнө нь тулааны спортоор мөнгө олох хамгийн шилдэг газар байсан бол одоо хамгийн муу нь болж хувирсан байна. Удирдлагууд нь фэнүүдээ алдсан ч хамаагүй, зөвхөн стриминг үйлчилгээнээс орох тогтмол орлогодоо найдаж, тулаанчдын оруулсан хувь нэмрийг хүндэтгэхээ больсон гэж тэрээр шүүмжлэв.
Ронда Раузи энэхүү шүүмжлэлээрээ UFC-ийн удирдлагуудад тэдний байр суурь хэчнээн эмзэг байгааг сануулж, тамирчдыг бодитой үнэлэх цаг болсныг илэрхийлэхийг хүсжээ. Түүний ММА-д эргэн ирж буй “MVP MMA 1” тэмцээн тавдугаар сарын 16-нд Калифорни мужийн Инглвуд хотын “Интуит Доум” ордонд зохион байгуулагдах хуваарьтай байна.
Дэлгэрэнгүйг эх сурвалжаас харах
