Холимог тулааны туршлагатай тамирчин Лорэнц Ларкин ирэх тавдугаар сарын 16-нд Калифорни мужийн “Интуит Доум” ордонд болох Netflix-ийн анхны ММА арга хэмжээнд оролцохоор бэлтгэж байна. Ронда Раузи, Жина Карано болон Фрэнсис Нганну, Нэйт Диаз нарын супер тулаанууд багтсан энэхүү үдшийн дэд тулаанд Ларкин “Bellator”-ын хагас дунд жингийн аварга асан Жейсон Жексонтой хүч үзэх юм.
Хэдийгээр Ларкин ийм томоохон хэмжээний арга хэмжээнд уригдсандаа баяртай байгаа ч өрсөлдөгч Жейсон Жексоныг дэлхийн хамгийн том холбоо болох UFC яагаад өөртөө нэгтгээгүй вэ гэдэгт ихэд гайхаж буйгаа илэрхийлжээ. Жексон бол “Bellator”-ын босоо аварга байсан Ярослав Амосовын 27 дараалсан ялалтын цувралыг зогсоож, гайхалтай нокаутаар аварга болж байсан өндөр ур чадвартай тамирчин юм. Тэрээр хамгийн сүүлд ПФЛ холбоонд хүч үзэж байгаад Жейк Полын “Most Valuable Promotions”-той гэрээ байгуулснаар энэхүү тэмцээнд тулалдахаар болжээ.
“Би өрсөлдөгчийнхөө нэрийг сонсоод баярласан ч нөгөө талаар ‘Юу болоод байна вэ?’ гэж гайхсан” хэмээн Ларкин “MMA Junkie Radio”-д ярьжээ. Тэрээр үргэлжлүүлэн “Би өөрөө нас ахиж яваагаа ойлгож байна, гэхдээ Жейсон шиг ийм шилдэг тулаанч яагаад UFC-д байхгүй байгаа юм бэ? Энэ нь надад нэг талаар гомдолтой санагдсан” хэмээн мэргэжил нэгт тамирчнаа өмгөөлсөн байна.
Өдгөө 39 настай Лорэнц Ларкины хувьд сүүлийн 11 тулааныхаа ердөө нэгд нь бүдэрсэн амжилттай байгаа бөгөөд хамгийн сүүлд 2024 оны есдүгээр сард Леван Чохэлиг ердөө хоёрхон минутын дотор нокаутаар буулган авсан юм. Хэдийгээр тэрээр ПФЛ холбоотой гэрээгээ сунгаагүй ч ийнхүү Netflix-ийн түүхэн арга хэмжээнд оролцож, “Алдагдсан машин” хочит Жексонтой октагоныг хуваалцахаар болсон нь тулаан сонирхогчдын дунд хүлээлт үүсгээд байна.
Дэлгэрэнгүйг эх сурвалжаас харах
