UFC-ийн хүнд жингийн аварга асан Фрэнсис Нганну холимог тулааны (ММА) октагондоо эргэн ирэхээр бэлтгэж байна. Тэрээр ирэх тавдугаар сарын 16-нд болох Netflix-ийн түүхэн дэх анхны ММА арга хэмжээний гол тулаанд Филип Линстэй нүүр тулах юм. 2024 оны 10 дугаар сард PFL холбоонд анхны тулаанаа хийж ялалт байгуулснаас хойш тулалдаагүй байсан тэрээр ийнхүү үзэгчдийн хүлээлт дор эргэн ирж байна.
Саяхан олон нийтийн сүлжээнд цацагдсан Нганнугийн бэлтгэлийн видео бичлэг тулаан сонирхогчдын дунд ихээхэн шуугиан тарьлаа. Бичлэг дээр Нганну өөрийн дасгалжуулагч Дьюи Куперын барьсан “пад” руу асар хүчтэй цохилтууд хийж байгаа нь харагдсан юм. Энэхүү аймшигт хүчтэй цохилтуудыг харсан фэнүүд нь түүний өрсөлдөгч Филип Линсийн аюулгүй байдалд санаа зовж буйгаа илэрхийлцгээжээ.
Инстаграм болон X (хуучнаар Twitter) сүлжээнд хэрэглэгчид “Линс, амар амгалан нойрс доо”, “Тэнгэрийн хаалга харагдах нь дээ”, “Тэр дасгалжуулагч нь амьдралдаа харамсаж суугаа байх” гэх мэт сэтгэгдлүүдийг үлдээсэн байна. Нганну сүүлийн таван жилийн хугацаанд октагонд нэг ч ялагдаагүй яваа бөгөөд 2021 онд Стипе Миочичийг буулган авч аварга болж байсан түүхтэй.
Түүний өрсөлдөгч Филип Линсийн хувьд UFC-д дөрвөн дараалсан ялалт байгуулсан амжилттай байсан ч 2024 онд тус холбооноос халагдсан юм. Тэрээр Нганнугаас ч илүү урт хугацааны завсарлага аваад байгаа бөгөөд энэхүү тулаан түүний карьерын хамгийн хүнд сорилт болно гэж шинжээчид үзэж байна. Netflix-ийн энэхүү арга хэмжээний үеэр Нганну, Линс нарын тулаанаас гадна Ронда Раузи, Жина Карано нарын тулаан болох тул дэлхий нийтийн анхаарлын төвд байна.
