Корнелл их сургуулийн Герман хэлний профессор Матиас Фелпс хиймэл оюун ухааны (AI) хэт хэрэглээнээс үүдэлтэй сургалтын чанарт санаа зовниж, нэгэн өвөрмөц шийдэл гаргажээ. Тэрээр хичээлийнхээ хүрээнд оюутнуудад компьютер биш, хуучны бичгийн машин ашиглахыг шаардах болсон байна.
Профессор Фелпс 2023 оны хавар оюутнууд бие даалт, орчуулгын даалгавраа гүйцэтгэхдээ AI болон автомат орчуулгын хэрэгслүүдийг хэт их ашиглаж байгаад урам хугарсан тул энэхүү “аналог” арга барилыг нэвтрүүлжээ. Тэрээр өөрийн хөрөнгөөр хуучин бичгийн машинууд худалдан авч, оюутнуудад дижитал технологигүй үеийн суралцах бодит туршлагыг мэдрүүлэхийг зорьсон байна.
Оюутнуудын үзэж буйгаар, бичгийн машинаар бичих нь зөвхөн техник ашиглах бус, суралцах орчинд эерэг өөрчлөлтүүдийг авчирчээ. Дэлгэцнээс ангид байх нь оюутнуудыг бие даан бодож, өгүүлбэр бүрээ нягтлан найруулахад тусалдаг байна. Мөн оюутнууд бие биетэйгээ илүү их ярилцаж, хамтран ажиллах нь орчин үеийн “дижитал” анги танхимаас эрс ялгаатай байсныг онцолжээ. Оюутнууд энэхүү туршлагыг “хөгжилтэй бөгөөд сонирхолтой сорилт” хэмээн дүгнэсэн байна.
Энэхүү санаачилга нь боловсролын салбарт AI-ийн нөлөөллийг хязгаарлах цорын ганц арга биш юм. Өнөөдөр олон багш нар оюутнуудын мэдлэгийг бодитоор үнэлэхийн тулд аман шалгалт авах, гар бичмэлээр даалгавар шаардах, ангид гар утас ашиглахыг хориглох зэрэг уламжлалт аргууд руу эргэн орж байна. Профессор Фелпсийн энэхүү алхам нь технологийн эрин үед “хүн өөрөө сэтгэх” чадварыг хамгаалж үлдэх нэгэн сонирхолтой жишээ болон үлдэв.
Дэлгэрэнгүйг эх сурвалжаас харах
