Ирландын Дублин хотын Крамлин дүүрэгт зохион байгуулагдсан боксын үзүүлэх тоглолтын үеэр UFC-ийн хоёр жингийн аварга асан Конор МакГрегор гэнэтийн оролцоо хийж, хөгжөөн дэмжигчдээ гайхшрууллаа. Тэрээр өөрийн анхны клуб болох “Крамлин” боксын клубын уламжлалт арга хэмжээнд оролцож, гурван үеийн турш тулалдсан байна.
“The Notorious” хочит МакГрегор тулааны явцад өөрийн ур чадварыг гайхуулж, өрсөлдөгчөө хүчтэй цохилтоор хоёр удаа хүнд байдалд оруулснаар шүүгч тоологоход хүрсэн байна. Энэхүү тоглолт нь түүнийг тулааны спортдоо, тэр дундаа UFC-д эргэн ирэх бэлтгэлээ базааж буй тухай цуу яриаг дахин эрч авхууллаа.
Өдгөө 37 настай тулаанч 2021 оны долдугаар сард “UFC 264” тэмцээний үеэр Дастин Пуарьетай тулалдахдаа хөлөө хүнд бэртээж, техникийн нокаутаар ялагдсанаас хойш таван жил орчим хугацаанд октагонд гараагүй байгаа юм. Тэрээр 2016 онд UFC-ийн түүхэнд анх удаа нэгэн зэрэг хоёр жингийн аварга цолыг эзэмшиж, Нэйт Диазтай домогт цуврал тулаануудыг хийж байсан билээ.
Гэвч сүүлийн жилүүдэд түүний амжилт тогтворгүй байгаа бөгөөд 2017 онд Флойд Мэйуэзертэй хийсэн боксын тулаанд ялагдсанаас хойш ердөө дөрвөн удаа тулалдаж, тэдгээрийн гуравт нь (Хабиб Нурмагомедов болон Дастин Пуарье нарт) ялагдал хүлээгээд байгаа юм. Түүний сүүлийн ялалт нь 2020 оны нэгдүгээр сард Дональд Серронег буулган авсан тулаан байв. Ирланд эр ийнхүү рингэнд эргэн гарсан нь түүний ирээдүйн төлөвлөгөөг сонирхогчдын анхаарлын төвд дахин авчирлаа.
Дэлгэрэнгүйг эх сурвалжаас харах
