Microsoft корпорацийн гүйцэтгэх захирал Сатя Наделла өнгөрсөн хугацаанд Copilot хиймэл оюун ухаант туслахыг өөрийн өдөр тутмын ажлын салшгүй хэсэг хэмээн онцолж, томоохон төслүүд дээр хэрхэн үр дүнтэй ашиглаж байгаагаа хуваалцаж байсан билээ. Гэвч тус компанийн гаргасан үйлчилгээний нөхцөлийн шинэчлэлт хэрэглэгчдийн дунд багагүй эргэлзээ төрүүлээд байна.
2025 оны 10 дугаар сарын 24-нд шинэчлэгдсэн Copilot-ын ашиглах нөхцөлд уг системийг “зөвхөн зугаацуулах зорилготой” хэмээн тодорхойлжээ. Мөн уг заалтад хиймэл оюун ухаан алдаа гаргаж болох бөгөөд төлөвлөснөөр ажиллахгүй байх магадлалтай тул чухал шийдвэр гаргахдаа Copilot-ын зөвлөгөөнд найдахгүй байхыг анхааруулсан байна. Хэрэглэгч ямар нэгэн эрсдэл гарсан тохиолдолд өөрөө хариуцлага хүлээнэ гэдгийг ч тодорхой дурджээ.
Энэхүү заалтын талаар Microsoft-ын төлөөлөгч PCMag сэтгүүлд тайлбар өгөхдөө “Зугаацуулах зорилготой” гэх томъёолол нь Copilot-ыг анх Bing хайлтын системийн туслах хэлбэрээр нээж байх үеийн хуучин найруулга гэдгийг хэлсэн байна. Бүтээгдэхүүн хөгжихийн хэрээр уг хэллэг нь өнөөгийн бодит хэрэглээг бүрэн илэрхийлэхээ больсон тул дараагийн шинэчлэлтээр өөрчлөхөөр ажиллаж байгаа аж.
Хэдийгээр компани үүнийг техникийн алдаа эсвэл хуучин найруулга гэж тайлбарлаж байгаа ч, хиймэл оюун ухаан хөгжүүлэгч томоохон компаниуд хууль эрх зүйн хариуцлагаас зайлсхийхийн тулд ийм төрлийн хатуу заалтуудыг ашиглах нөхцөлдөө тусгасаар байгааг шинжээчид сануулж байна.
