OpenAI компани хүнээс илүү чадвартай хиймэл оюун ухаан буюу супер оюун ухаан нь Аж үйлдвэрийн хувьсгалтай адил хэмжээний нөлөө үзүүлж, шинэ нийгмийн гэрээг шаардана гэж үзэж байна. Тус компани энэ асуудлыг шийдвэрлэх зорилгоор “Аж үйлдвэрийн бодлого: Оюун ухааны эрин үеийг хүмүүсийг нэн тэргүүнд тавих санаанууд” нэртэй бодлогын санал боловсруулжээ.
Энэхүү баримт бичиг нь нийгэмд хиймэл оюун ухааны нөлөөг даван туулах талаар хэлэлцүүлэг өрнүүлэх зорилготой бөгөөд нийтийн өмчийн сан байгуулах, ажлын долоо хоногийг дөрвөн өдөр буюу 32 цаг болгох, цахилгаан эрчим хүчний сүлжээнд хөрөнгө оруулах, нийгмийн хамгааллыг бэхжүүлэх зэрэг бодлогын саналуудыг агуулж байна. OpenAI хиймэл оюун ухааны ирээдүйг ардчилсан журмаар бүтээж, боломжит бүх хувилбарт бэлэн байх ёстой гэж үзэж байгаа юм.
АНУ-ын улс төрчид тус салбарыг зохицуулах талаар санал нэгдэж чадаагүй байгаа энэ үед уг саналууд гарч ирж байна. Ерөнхийлөгч Дональд Трамп экспортод дарамт учруулж буй зохицуулалтыг хязгаарлах зарлиг гаргасан бол сенатор Берни Сандерс болон конгрессмен Алехандра Окасио-Кортез нар дата төвүүдийн барилгын ажлыг түр зогсоох хуулийн төсөл дээр ажиллаж байгаа юм.
OpenAI-ийн баримт бичигт технологийн давуу тал нь эрсдэлээсээ илүү байна гэж дурдсан ч ажлын байр алдагдах, технологийн буруу хэрэглээ, баялгийн төвлөрөл нэмэгдэх зэрэг аюулыг хүлээн зөвшөөрчээ. Иймд иргэн бүрт эдийн засгийн өсөлтөөс хувь эзэмшүүлэх нийтийн өмчийн сан байгуулах, татварын тогтолцоог өөрчилж ажлын орлогоос илүү корпорацийн ашиг, хөрөнгийн өсөлтөд ногдох татварыг нэмэгдүүлэх зэрэг зоримог шинэчлэлүүдийг дэвшүүлсэн байна.
Түүнчлэн дэд бүтцийг дэмжих, аюулгүй байдлын хяналтын системийг бий болгох зэрэг өргөн хүрээний саналуудыг тусгажээ. OpenAI эдгээр саналыг хөгжүүлэх төслүүдэд 100,000 ам.доллар хүртэлх тэтгэлэг, 1 сая ам.доллар хүртэлх API кредит олгох туршилтын хөтөлбөрүүдийг зарлаад байна. Энэхүү алхам нь тус компани IPO хийхээр бэлтгэж буй энэ үед хөрөнгө оруулагчид болон улс төрчдөд итгэл төрүүлэх оролдлого байж магадгүй хэмээн шинжээчид үзэж байна.
