ОХУ-ын бүрэлдэхүүн дэх Алтайн Бүгд Найрамдах Улсын эрх баригчид дайнд оролцсон ахмад дайчдыг ажилд авахаас татгалзсан аж ахуйн нэгжүүдэд торгууль ногдуулах шийдвэр гаргалаа. Энэхүү алхам нь Украины дайнаас эргэн ирж буй цэргүүдийг иргэний нийгэмд дасан зохицоход нь дэмжлэг үзүүлэх зорилготой юм.
Өнгөрсөн оны 11 дүгээр сард батлагдсан хуулийн дагуу 100-аас дээш ажилтантай компаниуд нийт ажлын байрныхаа 1.2 хувийг ахмад дайчдад зориулан тусгаарлах үүрэг хүлээсэн байна. Гэвч хууль хэрэгжиж эхэлснээс хойш тус бүс нутагт ердөө 32 цэрэг л шинэ ажлын байртай болсон нь хүлээлтээс харьцангуй бага үзүүлэлт болжээ.
Үүнтэй холбогдуулан Бүс нутгийн Засгийн газраас дараах торгуулийн хэмжээг тогтоогоод байна:
- Албан тушаалтнуудад: 10,000 рубль (110 орчим ам.доллар)
- Компани, аж ахуйн нэгжүүдэд: 25,000 рубль (275 орчим ам.доллар) хүртэлх торгууль ногдуулна.
Алтайн Бүгд Найрамдах Улсын тэргүүн Андрей Турчак “Бидний нэн тэргүүний зорилт бол тусгай цэргийн ажиллагаанаас эргэн ирсэн дайчдыг иргэний амьдралд нь саадгүй нэгтгэж, тогтвортой ажлын байраар хангах явдал” хэмээн мэдэгдэв.
Энэхүү туршлагыг ОХУ-ын бусад бүс нутгууд ч нэвтрүүлэхээр төлөвлөж байна. Тухайлбал, Красноярскийн хязгаарт 100-аас дээш ажилтантай компаниудад 1 хувийн квот тогтоох асуудлыг хэлэлцэж байгаа аж. Хэдийгээр одоогоор бүс нутгуудад нэгдсэн нэг стандарт тогтож амжаагүй байгаа ч ахмад дайчдыг ажлын байраар хангах асуудал холбооны хэмжээнд хүчтэй яригдаж эхэллээ.
