АНУ-ын Ерөнхийлөгч Дональд Трампын засаг захиргаа 2027 оны санхүүгийн жилд зориулсан батлан хамгаалах төсвийн төслөө танилцууллаа. Нийт 1.5 их наяд ам.долларын санхүүжилт хүссэн нь 2026 оныхоос даруй 445 тэрбум ам.доллараар буюу 44 хувиар өссөн, түүхэн дэх хамгийн өндөр үзүүлэлт болж байна. Энэхүү төсвийн 1.15 их наяд ам.долларыг үндсэн төсвөөр, үлдэх 350 тэрбум ам.долларыг төсвийн зохицуулалтын тусгай арга замаар шийдвэрлэхээр төлөвлөжээ. Уг төсөв нь цэргийн хүчийг шинэчлэх, технологийн давуу байдлыг хадгалах, “хүчээр дамжуулан энх тайвныг тогтоох” бодлогыг хэрэгжүүлэх үндсэн зорилготой юм.
Агаарын цэргийн салбарт удирдлагатай дронуудын худалдан авалтад 1 тэрбум орчим ам.доллар, шинэ үеийн F-47 стелт сөнөөгч онгоцны хөгжүүлэлтэд 5 тэрбум ам.доллар тус тус төсөвлөжээ. Мөн AIM-260 агаараас агаарт харвах пуужин болон хэт өндөр хурдны пуужингуудын үйлдвэрлэлийг түргэтгэхэд их хэмжээний хөрөнгө төвлөрүүлэхээр тусгасан байна. Далайн цэргийн салбарт 65.8 тэрбум ам.доллараар нийт 34 хөлөг онгоц худалдан авахаар төлөвлөсөн нь 1962 оноос хойших хамгийн өндөр үзүүлэлт боллоо. Үүнд хоёр ширхэг Virginia ангиллын цөмийн шумбагч, нэг Columbia ангиллын баллистик пуужин тээгч шумбагч болон “Trump-class” хэмээх шинэ ангиллын байлдааны хөлөг онгоцны эхний санхүүжилт багтжээ.
Түүнчлэн АНУ-ын газар нутгийг пуужингийн довтолгооноос бүрэн хамгаалах “Golden Dome” хөтөлбөрт 17.5 тэрбум ам.доллар, сансрын цэргийн хүчний төсвийг 71.2 тэрбум ам.доллар болгон огцом нэмэгдүүлсэн нь сансрын домэйнд давамгайлах стратегийг харуулж байна. Цэргийн албан хаагчдын цалинг 7 хүртэл хувиар нэмэгдүүлэх, хиймэл оюун ухааныг батлан хамгаалахын салбарт нэвтрүүлэхэд 1.2 тэрбум ам.доллар зарцуулах зэрэг заалтууд уг төсөлд багтсан байна. Энэхүү төсвийн төсөл нь АНУ-ын түүхэнд байгаагүй нүсэр зардлыг цэргийн хүчийг нэмэгдүүлэхэд чиглүүлж буй Трампын засаг захиргааны тууштай бодлогын илрэл болж байна.
