“Vogue” сэтгүүлийн 5-р сарын дугаар загварын ертөнцөд жинхэнэ шуугиан тарьж байна. Тус сэтгүүлийн ерөнхий редактор Анна Винтур болон алдарт “The Devil Wears Prada” киноны дүрээрээ танигдсан жүжигчин Мэрил Стрип нар хамтдаа сэтгүүлийн нүүрийг чимжээ.
Энэхүү түүхэн зураг авалтад Мэрил Стрип өөрийн бүтээсэн Миранда Пристлигийн дүрийг эргэн санагдуулам төрхтэйгээр, харин Анна Винтур өөрийн сонгодог хэв маягаар оролцсон байна. Хоёул Prada брэндийн хувцсаар гоёсон нь онцлог бөгөөд уг зураг сэтгүүлийн Инстаграм хуудсанд тавигдсан даруйдаа сая гаруй лайк авч, цахим ертөнцөд хүчтэй тархаад байна.
Шинжээчдийн үзэж буйгаар энэхүү нүүр зураг нь зөвхөн удахгүй нээлтээ хийх “The Devil Wears Prada 2” киноны маркетингийн ажил биш юм. Энэ нь Анна Винтурын хувьд өөрийн эрх мэдлийг баталгаажуулсан стратегийн чухал алхам гэж харагдаж байна. Condé Nast-ийн бүтцийн өөрчлөлтөөс хойш 10 сарын дараа тэрээр ийнхүү нүүр хуудсанд заларсан нь Vogue-д түүний нөлөө хэвээр байгааг санууллаа. Загварын шинжээч Марк Борковски Винтурын энэхүү алхмыг “маш ухаалаг” хэмээн үнэлж, тэрээр өөрийгөө загварын ертөнцийн салшгүй брэнд болгож чадсаныг онцолжээ.
Өмнө нь Анна Винтур өөрийнх нь амьдралаас сэдэвлэсэн гэгддэг уг кино болон Миранда Пристлигийн дүрд тийм ч таатай ханддаггүй байсан. Гэвч энэ удаад тэрээр уг дүрийг “хэтрүүлсэн, хөгжилтэй” хэмээн хүлээн зөвшөөрч, хошин мэдрэмжтэйгээр хандах болсон нь түүний хувийн брэндийг улам бататгаж байна. Vogue-ийн 5-р сарын дугаар тун удахгүй уншигчдын гарт очих бөгөөд “The Devil Wears Prada 2” киноны талаарх дэлгэрэнгүй мэдээллүүдийг багтаах төлөвтэй байна.
