“Тоттенхэм Хотспур” багийн шинэ дасгалжуулагчаар томилогдсон Роберто Де Зерби өнөөдөр анхны хэвлэлийн бага хурлаа хийж, багийн өнөөгийн байдал болон ирээдүйн төлөвлөгөөнийхөө талаар мэдээлэл өглөө. Тэрээр ажлаа хүлээн авсан эхний өдрүүдээ “азгүй эхлэл” хэмээн тодорхойлсон нь багийн гол тоглогч Мохаммед Кудусын хүнд бэртэлтэй холбоотой юм.
Мохаммед Кудус мэс засалд орсон бөгөөд ойролцоогоор гурван сарын хугацаанд талбайд гарах боломжгүй болсон нь Де Зербигийн тактикийн төлөвлөгөөнд томоохон цохилт болжээ. “Кудус миний тоглолтын системд маш чухал үүрэгтэй тоглогч байсан учраас энэ мэдээ надад хүнд туссан. Гэхдээ бидэнд ухарч суух цаг алга” хэмээн итали мэргэжилтэн онцлов.
Премьер лигийн хүснэгтийн 17-р байранд, лиг дуусахад ердөө долоон тоглолт үлдсэн эгзэгтэй үед багийг хүлээн авсан тэрээр довтолгооны шугамын бусад тоглогчдодоо итгэл хүлээлгэж байна. Де Зерби хэлэхдээ “Бидэнд Коло Муани, Матис Тель, Хави Симонс, Ришарлисон болон Соланке зэрэг өндөр ур чадвартай довтлогчид бий. Тэд Кудусын орон зайг нөхөж, багийг ялалтад хөтөлж чадна гэдэгт би 100 хувь итгэлтэй байна” гэлээ.
Мөн тэрээр багийн бусад тоглогчдын бэртлийн талаар шинэ мэдээлэл өгсөн юм. Үндсэн хаалгач Гульельмо Викарио “Сандерленд”-тэй хийх тоглолтыг өнжихөөр болсон ч ирэх долоо хоног гэхэд эргэн ирэх төлөвтэй байгаа аж. Харин хагас хамгаалагч Родриго Бентанкур бэлтгэлдээ гарсан ч тоглолтод бүрэн оролцоход хараахан бэлэн болоогүй байгааг дуулгав. Де Зербигийн удирдлага доорх “Тоттенхэм”-ийн эхний сорилт тун удахгүй болох бөгөөд хөгжөөн дэмжигчид түүний “сонирхолтой хөлбөмбөг” багийг нь аюултай бүсээс гаргаж чадах эсэхийг хүлээж байна.
