“Филадельфиа 76ерс” багийн тэргүүн тоглогч Жоел Эмбийд мухар олгой авах яаралтай мэс засалд орсон нь багийн ирээдүйг эрс өөрчлөхөд хүргэлээ. Энэхүү гэнэтийн мэдээ нь багийн тоглогчид болон хөгжөөн дэмжигчдийг цочирдуулаад байна. Саяхан “Хьюстон Рокетс” багт 113-102-оор хожигдсоноор 76ерс плей-оффт шууд шалгарах боломжоо бараг алдаж, плей-ин тэмцээнд оролцох нь тодорхой болсон. Гэвч багийн гол багана болох Эмбийдгүйгээр шийдвэрлэх тоглолтуудад оролцох нь тэдний хувьд маш том сорилт юм.
Эмбийд мэс засалд орох хүртлээ бэлтгэлдээ бүрэн оролцож байсан нь асуудлыг илүү гэнэтийн болгожээ. Шинэхэн тоглогч Ви Жэй Эджкомб “Тэр бол бидний удирдагч. Энэ бол сагсан бөмбөгөөс ч илүү чухал асуудал. Ээж маань надад мухар олгой үрэвсэх нь ямар аюултай болохыг тайлбарлаж өгсөн, үнэхээр аймшигтай зүйл” хэмээн сэтгэгдлээ хуваалцсан байна. Харин төвийн тоглогч Андре Драммонд багийн нөөц бололцоонд итгэлтэй байгаагаа илэрхийлж, Жоел байгаа эсэхээс үл хамааран аварга болох зорилго хэвээр байгааг онцолжээ.
Жоел Эмбийд энэ улиралд 38 тоглолтод оролцохдоо дунджаар 27 оноо авч, багийнхаа довтолгооны гол цөм байсан юм. Мэс заслын дараах нөхөн сэргээх хугацаа 10-14 хоног үргэлжлэх тул тэрээр плей-ин шатны тоглолтуудыг өнжих нь бараг тодорхой болсон. 76ерс-д зургадугаар байрт орж шууд шалгарах ганцхан боломж үлдсэн нь үлдсэн хоёр тоглолтдоо заавал ялж, “Торонто Рэпторс” хоёр тоглолтдоо хожигдох шаардлагатай юм. Эмбийдгүйгээр тоглохоос гадна Тайрис Максигийн хурууны бэртэл багт нэмэлт дарамт болж байгаа бөгөөд одоо тэд амьд үлдэхийн тулд хамгаалалтаа сайжруулж, илүү эрч хүчтэй тоглохоос өөр сонголтгүй боллоо.
