АНУ-ын Тээврийн сайд асан Пит Буттижег CNBC сувгийн “Squawk Box” нэвтрүүлэгт оролцохдоо хөтлөгч Жо Кернентэй Ираны эсрэг явуулж буй цэргийн ажиллагаа болон Дональд Трампын инфляцыг бууруулах амлалт хэрхэн биелээгүй талаар ширүүн маргаан өрнүүллээ.
АНУ болон Израил улс Ираны цөмийн хөтөлбөр, алсын тусгалтай зэвсгийн аюул заналхийллийн эсрэг цэргийн ажиллагаа эхлүүлээд зургаан долоо хоног болж байна. Өнгөрсөн Мягмар гарагт хоёр долоо хоногийн хугацаатай гал зогсоох хэлэлцээр байгуулагдсанаар байлдааны ажиллагаа намжсан ч хоёр орны харилцаа туйлын эмзэг хэвээр байгаа юм. Энэхүү геополитикийн хямралаас үүдэн газрын тосны үнэ огцом өсөж, АНУ-д бензиний үнэ 1 галлон тутамд 4 ам.доллараас давж, дизель түлш 5.70 ам.долларт хүрээд байна.
Сүүлийн мэдээллээр 3-р сарын байдлаар инфляц 0.9 хувиар өсөж, жилийн инфляцын түвшин 3.3 хувьд хүрсэн нь Ерөнхийлөгч Трампын өгч байсан амлалттай зөрчилдөж буйг Буттижег онцоллоо. Тэрээр хэлэхдээ, “Ерөнхийлөгч цэргүүдээ дайнд явуулж байгаа бол дээд удирдлага нь өөр сонголтгүй нөхцөлд энэ шийдвэрийг гаргасан гэдэгт итгэлтэй байх ёстой” хэмээн байр сууриа илэрхийлэв. Хөтлөгч Кернен Ираны дэглэмийг “өөрийн ард түмэн болон АНУ-ын иргэдийг хөнөөдөг, дэлхий даяар үймээн самуун дэгдээдэг” хэмээн буруутгаж, “Энэ ерөнхийлөгч яагаад тэр бүлэглэлийг хэвээр үлдээсэн бэ?” гэж асуусан байна.
Буттижег хариуд нь одоо нэгэнт эхэлсэн ажиллагаанаас ухрах зам байхгүй ч эдийн засагт үзүүлэх дарамтыг багасгах нь чухал болохын санууллаа. Тэрээр “Одоо газрын тос 100 ам.доллар, онгоцны түлш 200 ам.доллар, бензин 4 ам.доллар давж, дизель түлш 5.50 ам.доллар болоод байна. Иргэд бензинд хэт их мөнгө төлөхгүй байх тийм байдлаар энэ асуудал төгсөөсэй гэж би хүсэж байна” гэв. Хөтлөгч Кернен “Трампын үед бензиний үнэ дунджаар 3.80 ам.доллар байсан” хэмээн хөндлөнгөөс залруулахыг оролдсон ч Буттижег “Биднийг засаг барьж байхад инфляц өнөөдрийнхөөс хамаагүй бага байсан” хэмээн хариу барьсан юм.
