Billboard сэтгүүлээс гаргасан “Бүх цаг үеийн шилдэг 100 кантри дуу”-ны шинэчилсэн жагсаалтыг домогт дуучин Долли Партоны 1973 онд гаргасан “Jolene” дуу тэргүүлж, хөгжмийн ертөнцийг дахин шуугиуллаа. Хагас зуун жилийн өмнө мэндэлсэн энэхүү бүтээл нь кантри хөгжмийн урсгалын хил хязгаарыг давж, орчин үеийн хөгжмийн урлагт арилшгүй мөрөө үлдээсэн жинхэнэ сод бүтээл болохоо ийнхүү дахин батлав.
“Jolene” анх худалдаанд гарсан даруйдаа Billboard Country Songs чартыг итгэл төгс тэргүүлээд зогсохгүй, тухайн үеийн поп хөгжмийн гол үзүүлэлт болох Billboard Hot 100 чартын 60 дугаар байрт шалгарч байсан нь кантри уран бүтээлчийн хувьд ер бусын амжилт байлаа. Сонсогчдын сэтгэлийг хамгийн ихээр хөдөлгөдөг зүйл нь дууны үнэнч, нээлттэй байдал юм. Долли Партон өөрөө энэ дууг бодит явдлаас сэдэвлэсэн гэдгээ хүлээн зөвшөөрсөн бөгөөд “галт уулын морь шиг” эрч хүчтэй гитарын аянд өөрийн нөхрийг нь булаахгүй байхыг үзэсгэлэнт бүсгүйгээс гуйж буй эмзэг мөртлөө хүчирхэг хоолой нь дэлхий даяарх сая сая сонсогчдын зүрхэнд хүрч чадсан билээ.
Өдгөө “Jolene” нь зөвхөн АНУ-д гэхэд дан ганц дижитал хэлбэрээр 935,000 гаруй хувь борлогдож, Долли Партоны карьерын хамгийн алдартай, хамгийн ихээр дахин дуулагдсан бүтээл болон үлджээ. “9 to 5”, “Islands in the Stream” зэрэг олон хит дуунууд нь түүнийг алдар нэрд хүргэсэн ч “Jolene” дуу л түүнийг Америкийн кантри хөгжмийн түүхэн дэх хамгийн нөлөө бүхий, илэрхийлэл сайтай уран бүтээлч болох түүхэн замналыг нь бүрэн утгаар нь бататгаж өгсөн юм. Ийнхүү 1973 оны хит дуу 50 гаруй жилийн дараа ч хөгжмийн салбарын хамгийн өндөр хүндэтгэлийг хүртсээр байна.
