Инди-рок урсгалаар уран бүтээл туурвидаг алдарт The Rose хамтлаг шинэ цомог болон аялан тоглолтоо дуусгаад уран бүтээлийн түр завсарлага авахаар болсноо Инстаграм хуудсаараа дамжуулан шүтэн бишрэгчиддээ мэдэгдлээ. Тэд ирэх зургадугаар сарын 5-нд “ROSETOPIA” нэртэй аялан тоглолтоо эхлүүлэхээр товлосон бөгөөд үүнээс өмнө буюу энэ сарын 13-нд “Blue Moon” нэртэй шинэ синглээ сонсогчдод хүргэх юм. Мөн тэд “ROSE” нэртэй шинэ цомгоо гаргахаар төлөвлөж байгаа ч нээлтийн товоо хараахан зарлаагүй байна.
Хамтлагийн гишүүд өөрсдийн Инстаграм хуудсандаа “Сүүлийн 10 жилийн хугацаанд The Rose бидний хувьд гэр минь, аюулгүй газар, амьдрах урам зориг байлаа. Та бүхний дэмжлэгтэйгээр бид хайр, алдалт, мөрөөдлийг биелүүлэх гэж юу болохыг ойлгож авсан. Одоо бид амьдралынхаа энэ нэгэн бүлгийг та бүхэнтэй хамт хамгийн төгс байдлаар өндөрлүүлэхээр шийдлээ” хэмээн сэтгэгдлээ хуваалцжээ.
Энэхүү завсарлага нь хамтлаг бүрмөсөн тарах биш, харин гишүүд хувь хүнийхээ хувьд хөгжиж, өөрсдийгөө дахин олж, ирээдүйд илүү эрч хүчтэйгээр эргэн ирэх зорилготой аж. Шүтэн бишрэгчид нь тэдний шинэ уран бүтээлүүдийг болон “ROSETOPIA” аялан тоглолтыг сэтгэл догдлон хүлээж байна.
