1991 онд хөгжмийн ертөнцөд тэсрэлт хийсэн Nirvana хамтлагийн “Nevermind” цомог нь тухайн үеийн рок хөгжмийн чиг хандлагыг бүрэн өөрчилж, гранж урсгалыг дэлхий нийтэд таниулсан юм. DGC Records-оос 1991 оны есдүгээр сарын 24-нд худалдаанд гаргасан уг бүтээл нь өнөөдөр ч рок хөгжмийн түүхэн дэх хамгийн нөлөө бүхий цомгуудын нэгт зүй ёсоор тооцогдож байна.
“Nevermind” нь пънк рокын эрч хүч, поп аялгууны энгийн бүтэц болон бусад хөгжмийн урсгалуудын гайхалтай хослолоос бүрддэг. Хамтлагийн гоцлол дуучин Курт Кобейн хөгжмийн онол гэхээсээ илүү өөрийн зөн совин, өвөрмөц мэдрэмжээр дуунуудаа туурвидаг байсан бөгөөд гитарын “power chord” буюу хүчирхэг хөвчлөлүүдийг ашиглан гранж хөгжмийн үндсэн өнгө төрхийг тодорхойлсон юм.
Нэр хүндтэй “Rolling Stone” сэтгүүл 90-ээд оны шилдэг цомгуудын жагсаалтаа “Nevermind”-ийг нэгдүгээрт эрэмбэлсэн байдаг. Тус сэтгүүл уг цомгийг тухайн үеийн залуусын сэтгэл зүйн хямрал, нийгмийн эсэргүүцлийг рок хөгжмийн эрч хүчээр илэрхийлсэн шилдэг бүтээл хэмээн онцолсон юм. Үүнээс гадна “Audio Ink Radio” болон “Billboard” сэтгүүлүүд ч түүхэн дэх шилдэг бүтээлүүдийн нэг гэдгийг хүлээн зөвшөөрсөн байдаг.
Уг цомгийн амжилтын нэгэн тод жишээ бол 1992 оны нэгдүгээр сарын 11-нд “Billboard 200” чартыг тэргүүлж байсан поп хаан Майкл Жексоны “Dangerous” цомгийг ардаа орхиж, нэгдүгээрт бичигдсэн үйл явдал байлаа. Энэ нь гранж хөгжим поп соёлыг түлхэн унагаж, рок хөгжим дахин ноёрхож эхэлснийг дэлхий дахинд тунхагласан хэрэг байв.
Худалдаанд гараад гуч гаруй жил өнгөрсөн ч “Nevermind” цомог нь бүх төрлийн стриминг платформ дээр хамгийн их сонсогддог рок цомгуудын нэг хэвээр байна. Энэхүү бүтээл нь зөвхөн хөгжмийн цомог биш, харин үе үеийн залуусын тэмцэл, эрх чөлөөний бэлгэдэл болон мөнхөрчээ.
