Флойд Мэйуэзер зодог тайлснаас найман жилийн дараа Теренс Кроуфорд мөн л ялагдалгүй амжилттайгаар замналаа өндөрлүүллээ. Хэрэв тэдний эрин үе давхцаж, Америкийн хоёр шилдэг боксчин нэг рингэнд таарсан бол хэн нэгэн нь ялагдашгүй гэх амжилтаа алдах байсан биз. Филиппиний домогт боксчин Мэнни Пакьяо энэхүү “мөрөөдлийн тулаан”-ы талаар өөрийн байр сууриа илэрхийлжээ.
Техникийн хувьд маш өвөрмөц болох байсан энэ тулаанд Мэйуэзерийн хамгаалалтын гайхалтай ур чадвар, цаг хугацааны мэдрэмж болон Кроуфордын тактикийн уян хатан байдал, рингний мэдрэмж, оновчтой цохилтууд нь онцгойрч харагдах байлаа. Энэхүү тулаан нь ширүүн өрсөлдөөнөөс илүүтэйгээр жижиг алхмуудаар шийдэгдэх “шатар” шиг тулаан болох байсан нь дамжиггүй.
2015 онд Мэйуэзерт ялагдсан боловч энэ жил дахин нэгэн тулаан хийх магадлалтай байгаа Пакьяог DAZN сувгийн “Inside the Ring” нэвтрүүлэгт оролцох үеэр нь “Хоёр боксчны шилдэг үед хэн нь ялах байсан бэ?” гэж асуухад тэрээр Кроуфордыг нэгэн гол шалтгааны улмаас дэмжсэн юм.
“Би Теренс Кроуфордыг хоёулаа оргил үедээ байсан ч ялах байсан гэж бодож байна. Түүнд нэг давуу тал бий, тэр бол ‘southpaw’ буюу солгой байрлалаас тулалдах чадвар. Би Кроуфордыг солгой байрлалаар тулалдаж байхыг харсан, тэр үүнийг төгс эзэмшсэн. Тэр өөрийн давуу талыг хэрхэн бүрэн дүүрэн ашиглахаа мэддэг” гэж Пакьяо хэлжээ.
Кроуфордын байрлалаа чөлөөтэй сольдог тактик нь 42 тулааны турш өрсөлдөгчдөд нь шийдэж чадахгүй оньсого болсоор ирсэн. Тэрээр дасгалжуулагч Брайан “BoMac” Макинтайрын удирдлага дор өрсөлдөгч бүрийнхээ эсрэг төгс тоглолтыг үзүүлдэг байв. Үүний хамгийн сүүлийн жишээ нь Канело Альварестай хийсэн тулаан бөгөөд тэрээр ихэнхдээ солгой байрлалаас тулалдсан байна.
Мэйуэзер өмнө нь есөн удаа солгой боксчидтой тулалдаж ялж байсан ч Пакьяотой хийсэн тулаан нь түүний хувьд хамгийн ойрхон оноотой тулаануудын нэг байсан юм. Пакьяо ийнхүү итгэлтэй байгаа ч Мэйуэзерийг дэмжих хүчтэй аргументууд байсаар байгаа нь энэхүү сэдвийг боксын түүхэн дэх хамгийн алдартай, маргаантай мөрөөдлийн тулаануудын нэг болгож байна.
