ОХУ-ын Аюулаас хамгаалах алба (FSB) болон Мөрдөн байцаах хорооноос ням гарагт 1.2 их наяд гаруй рублийн (13.2 тэрбум ам.доллар) татварын луйвар хийсэн хэргийг илрүүлж, холбогдох этгээдүүдийг баривчилснаа мэдэгдлээ. Гэмт хэргийн бүлэглэл нь “цаасан НӨАТ” буюу хуурамч нэхэмжлэх олноор гаргах схемийг ашиглан татвараас зайлсхийх ажиллагааг зохион байгуулсан байна. 2023 оноос хойш тус сүлжээ нь Оросын 40,000 орчим компанид хуурамч нэхэмжлэх зарж, нэмэгдсэн өртгийн албан татварын (НӨАТ) төлбөрийг нь хууль бусаар бууруулахад тусалжээ.
Мөрдөн байцаах хорооны мэдээлснээр, эдгээр хуурамч нэхэмжлэхийг татварын байгууллагад гаргаж өгдөг тайлангуудад хууль бусаар тусгасан байна. Хууль хяналтын байгууллагаас зохион байгуулагчдыг хууль бусаар байгууллага үүсгэн байгуулсан, төлбөрийн хэрэгслийг хууль бусаар эргэлтэд оруулсан хэргээр яллаж байгаа юм. Гэмт хэрэгтнүүдийн дунд өмнө нь санхүүгийн залилангийн хэрэгт холбогдож байсан хүмүүс байгаа бөгөөд энэхүү сүлжээнд 4,800 гаруй дамжин өнгөрөх байгууллага хамрагджээ.
Цагдаагийн байгууллага Москва, Санкт-Петербург, Перм болон Белгород мужуудад 30 гаруй удаагийн нэгжлэг хийж, луйврыг зохион байгуулагчид болон түүнээс ашиг хүртсэн компаниудыг шалгаж байна. “Коммерсант” сонины мэдээлснээр, энэ нь долоо хоногийн дотор илэрсэн НӨАТ-ын хоёр дахь томоохон луйвар бөгөөд “цаасан НӨАТ” схемийн үйлчлүүлэгчдийн жагсаалтад улсын үйлдвэрүүд болон барилгын томоохон компаниуд багтсан нь анхаарал татаж байна. Одоогоор татварын зөвлөх үйлчилгээ үзүүлдэг “Tax Doctor” буюу “White Optima” брэндийн үйл ажиллагааг нарийвчлан шалгаж байгаа ажээ.
