Warner Bros. компанийн удаан хүлээгдэж буй “Ocean’s 11” киноны өмнөх түүхийг өгүүлэх (prequel) шинэ төсөл 2027 оны зургадугаар сарын 25-нд кино театруудад нээлтээ хийхээр боллоо.
Оскарын шагналд олон удаа нэр дэвшиж байсан Брэдли Купер энэхүү шинэ ангийн найруулагчаар ажиллахаар болсон төдийгүй жүжигчин Маргот Роббитэй хамтран гол дүрд тоглох юм. Купер зөвхөн найруулаад зогсохгүй кино зохиолыг бичих, продюсерээр ажиллах зэрэг голлох үүргүүдийг гүйцэтгэхээр болжээ. Өмнө нь тус төсөлд Райан Гослинг тоглохоор яригдаж байсан ч эцсийн шийдвэрээр Брэдли Купер түүнийг орлохоор болсон байна.
Киноны найруулагчаар “Twisters” киногоор танигдсан Ли Исаак Чангийг урихаар төлөвлөж байсан ч талууд тохиролцоонд хүрч чадаагүй тул ийнхүү Брэдли Куперт найруулах эрх шилжжээ. Энэхүү шинэ бүтээл нь алдарт “Ocean’s” цувралын түүхийг баяжуулсан, үзэгчдийн сонирхлыг татсан томоохон төсөл болно гэх хүлээлт үүсгээд байна.
