Майк Перри удахгүй болох тулааныхаа бэлтгэлийг UFC-гийн залуу од Терренс МакКиннитай хамтран базааж байгаагаа мэдэгдлээ.
Тус тулаан нь Netflix платформын анхны ММА арга хэмжээний хүрээнд ирэх тавдугаар сарын 16-нд болох бөгөөд Майк Перри, Нэйт Диаз нар октагонд эргэн ирж тулалдахаараа онцлог юм. Хоёр тулаанч хоёул ММА-аас хэдэн жил завсарлага авсны эцэст эргэн ирж буй тул энэхүү тулаан нь тулаан сонирхогчдын анхаарлын төвд байна. Спортын шинжээчид болон хөгжөөн дэмжигчдийн дунд Нэйт Диазыг ялах магадлал өндөр, тэр дундаа Перрийг боолтоор буулгаж авна гэх таамаглал давамгайлж байгаа юм.
Майк Перригийн хувьд энэ нь 2021 онд UFC-гээс явснаас хойш хийж буй анхны ММА тулаан болно. Тэрээр сүүлийн жилүүдэд бээлийгүй зодооны “Bare Knuckle Fighting Championship”-д амжилттай оролцож, боксын тулаанд Жейк Полтой хүч үзэж байсан билээ.
Перри бэлтгэлийнхээ талаар: “Бэлтгэл амаргүй байгаа ч би бие бялдар, хооллолт, нөхөн сэргээх эмчилгээндээ маш сайн анхаарч байна. Флорида мужийн Fusion X-Cel зааланд Терренс МакКинни зэрэг шилдэг тамирчидтай хамт бэлтгэл хийж байгаа. МакКинни бол гайхалтай бөх, маш сайн эсэргүүцэгч. Түүнтэй ажиллах нь надад маш их туршлага, тус болж байна” хэмээн ярьжээ.
UFC-гийн түүхэн дэх хамгийн хурдан нокаутуудын нэгийг эзэмшдэг Терренс МакКиннигийн хурд болон техникийн ур чадвар Майк Перригийн тоглолтод хэрхэн нөлөөлөхийг ирэх сарын 16-нд харах үлдлээ.
