Google компани хэрэглэгчдэд илүү хялбар, гар утасгүйгээр шууд ажиллах боломжийг олгох шинэ шийдлүүдийг нэвтрүүлж эхэллээ. Windows болон Apple-ийн төхөөрөмжүүдэд зориулсан шинэ Google аппликейшнүүд албан ёсоор хэрэглээнд нэвтэрч байна. Тухайлбал, Google компани өмнө нь туршилтын шатанд байсан Windows үйлдлийн системд зориулсан хайлтын програмаа албан ёсоор гаргасан байна. Энэхүү програм нь хэрэглэгчдэд Windows компьютер дээрээсээ шууд вэб хайлт хийх боломжийг олгож байгаа юм. Түүнчлэн Apple-ийн төхөөрөмжүүдэд зориулсан Gemini аппликейшн нь вэб хувилбарынхаа бүх давуу тал, онцлог шинжийг бүрэн агуулжээ.
Windows-д зориулсан Google app for desktop нь өнгөрсөн есдүгээр сард анх бета хувилбараар гарч байсан бөгөөд тухайн үед програм хангамжийн шинэчлэлт хийхэд зарим хүндрэл гарч байсан юм. Харин албан ёсны хувилбарт эдгээр алдааг засварлаж, хэрэглэгчид ямар нэгэн саадгүйгээр шууд шинэчлэлт хүлээн авах боломжтой боллоо.
Шинэ аппликейшнийг Alt + Space товчлуурын хослолыг ашиглан шууд нээх боломжтой бөгөөд зөвхөн вэб хайлт хийхээс гадна хэрэглэгчийн зөвшөөрлөөр компьютер дээрх файл, програмуудыг нэг дороос хайх боломжийг олгож байна. Хайлтын үр дүнд AI Overviews болон AI Mode зэрэг хиймэл оюун ухаанд суурилсан функцууд багтсан нь мэдээллийг илүү товч бөгөөд оновчтой хүлээн авахад тусална.
