OpenAI-ийн гүйцэтгэх захирал Сэм Алтманы Сан-Франциско дахь гэр рүү Молотов коктейль шидсэн хэрэгт сэжиглэгдэж буй этгээд халдлага үйлдэхээсээ өмнө интернэт орчинд технологийн салбарын удирдагчдын эсрэг хүчирхийлэл үйлдэх боломжийг хэлэлцэж байсан нь тогтоогдлоо.
20 настай Даниел Морено-Гама нь 2026 оны 4-р сарын 10-ны үүрээр Сэм Алтманы гэрийн хаалга руу шатаагч бодис шидэж, гал гаргаад зугтсан байна. Халдлагаас ердөө нэг цагийн дараа тэрээр OpenAI-ийн төв байрны шилэн хаалгыг сандлаар цохиж, дотор байгаа хүмүүсийг “хөнөөж, барилгыг шатаана” хэмээн заналхийлж байхдаа баригджээ. Түүний биеэс хэд хэдэн шатаагч бодис, керосин болон хиймэл оюун ухааныг (AI) эсэргүүцсэн манифест олдсон байна.
Сэжигтэн Морено-Гама нь 2024 оны сүүлээр UnitedHealthcare-ийн захирал Брайан Томпсоныг буудан хөнөөсөн Луижи Манжонегийн үйлдлийг сошиал орчинд сайшааж, бусад технологийн захирлуудыг ч мөн адил “Луижи маягаар” шийтгэх тухай хэлэлцэж байсан нь “The Wall Street Journal”-ийн мөрдлөгөөр тодорхой болсон юм. Тэрээр өөрийгөө “AI Doomer” буюу хиймэл оюун ухаан хүн төрөлхтнийг мөхөөх аюултай гэж үздэг нэгэн хэмээн тодорхойлж, Алтманыг “хүн төрөлхтнийг сүйрэл рүү хөтөлж буй” гол хүн хэмээн үзэж байжээ.
Халдлагын дараа Сэм Алтман өөрийн блогтоо гэр бүлийнхээ зургийг нийтэлж, технологийн эргэн тойрон дахь хэт туйлширсан шүүмжлэлүүд бодит амьдрал дээр аюул дагуулж байгааг анхааруулсан юм. Одоогоор Морено-Гамад аллагын оролдлого, санаатайгаар галдан шатаах зэрэг хүнд ялуудыг тулгаад байгаа бөгөөд прокурорууд энэхүү хэргийг “дотоодын терроризм” гэж үзэн шалгаж байна.
