Цахиурын хөндийн “Sabi” стартап компани хүний бодлыг компьютерт шууд дамжуулах чадвартай шинэ үеийн төхөөрөмж хөгжүүлж байгаагаа зарлалаа. Тус компани тархины дохиог уншиж, дэлгэц дээр текст болгон хувиргах зориулалттай “тархи уншдаг” зөөлөн малгайг энэ оны эцэс гэхэд худалдаанд гаргахаар төлөвлөж байна. Sabi-гийн гүйцэтгэх захирал Рахул Чабрагийн мэдээлснээр, эхний ээлжинд ноосон малгай (beanie) хэлбэртэй загвар гарах бөгөөд удалгүй бэйсболк малгайтай хувилбарыг ч танилцуулах ажээ.
Тархи-компьютерийн интерфейс (BCI) хэмээх энэхүү технологи нь тархи болон гадны төхөөрөмж хооронд шууд харилцаа тогтоодог. Илон Маскийн “Neuralink” зэрэг компаниуд мэс заслын аргаар тархинд чип суулгах технологийг хөгжүүлж байгаа бол “Sabi”-гийн малгай нь ямар нэгэн мэс ажилбар шаардахгүйгээр хэн ч “киборг” болох боломжийг олгож буйгаараа онцлог юм.
Тус төхөөрөмж нь электроэнцефалографи (EEG) буюу толгойн гадаргуугаас тархины цахилгаан идэвхийг бүртгэх аргыг ашигладаг. Одоогийн EEG төхөөрөмжүүд зөвхөн тодорхой команд таних хэмжээнд хязгаарлагдаж байгаа бол “Sabi”-гийн малгай нь 70,000-аас 100,000 орчим бичил мэдрэгч суулгаснаар бодлыг илүү нарийвчлалтай унших чадвартай болжээ.
Технологийн анхны зорилт нь минутад 30 орчим үг бичих хурдад хүрэх юм. Хэдийгээр энэ нь хүний гарны бичих хурднаас удаан боловч хэрэглэгч төхөөрөмжийг ашиглах тусам систем нь тухайн хүний тархины дохионд дасан зохицож, хурд нь нэмэгдэх боломжтойг Чабра онцолсон байна.
