Украйнд өрнөж буй дайны нөхцөл байдал сунжирч, тодорхойгүй байдал газар авснаар Оросын цэргүүд болон иргэдийн дунд зөн билгийн зан үйл, ид шидийн хамгаалалтад итгэх итгэл үнэмшил эрс нэмэгджээ. Энэхүү үзэгдэл нь улс төр, эдийн засгийн хямралын үед хүмүүс айдас түгшүүрээ дарах, ирээдүйгээ харах гэсэн оролдлого болж байна гэж шинжээчид үзэж байна.
Москва хотын зөнч Наталья Малиновскаягийн хэлснээр, фронтод тулалдаж буй цэргүүд болон тэдний ар гэрийнхэн ихэвчлэн амь насны хамгаалалт, хайр дурлалын асуудлаар ханддаг болжээ. Цэргүүд тулааны талбарт шууд үйлчилгээ авах боломжгүй тул голдуу амралтаараа ирсэн үедээ зөнчдөд хандаж, хамгаалалтын зан үйл хийлгэх болсон байна.
Оросын түүхэнд Ортодокс Христийн шашин болон ардын зөн билэг, далд хүчний итгэл үнэмшил нь үргэлж зэрэгцэн оршиж ирсэн уламжлалтай. Гэвч сүүлийн жилүүдэд энэхүү эрэлт урьд өмнө байгаагүйгээр өссөн бөгөөд судалгаагаар 2019 онд иргэдийн 30 хувь нь ид шидэд итгэдэг байсан бол өдгөө энэ үзүүлэлт 50 хувьд хүрчээ.
Зөн билгийн үйлчилгээ газар авч байгаатай холбогдуулан Оросын Төрийн Думын гишүүд зурхай, эрчим эмчилгээ зэрэг үйлчилгээний сурталчилгааг хориглох хуулийн төсөл боловсруулж эхэлжээ. Оросын Ортодокс сүмийн тэргүүн Патриарх Кирилл ч үүнийг дэмжиж, зөнчдийг “чөтгөрийн хүч” хэмээн нэрлэж, иргэдийг ийм төрлийн зан үйлээс хол байхыг анхааруулсан байна.
