Их Британийн боксчин Коннор Бенн Режис Прогрейсыг буулган авснаар дэлхийн аваргын бүсний төлөө тулалдах боломждоо нэг алхам ойртлоо. “Устгагч” хочит Бенн супер-хөнгөн жингийн дэлхийн аварга асан Прогрейстай 10 раунд тулалдаж, шүүгчдийн саналаар ялалт байгуулсан юм. Энэхүү тулааны дараа Прогрейс зодог тайлахаа мэдэгдсэн бол Бенн WBC-гийн чансааг тэргүүлж эхэлснээр Райан Гарсиаг тулаанд дуудсан байна.
Зуны халуун тулаан баталгаажих шатандаа
Райан Гарсиа цахим орчинд уг сорилтыг хүлээн авч, тулааны хэлэлцээ амжилттай үргэлжилж байгааг “Boxing Scene” болон бусад эх сурвалжууд мэдээллээ. Гарсиа “Kick” платформоор дамжуулан “Наймдугаар сард Лас Вегас хотноо миний бие Их Британийн Коннор Беннтэй тулалдана. Энэ бол миний бүсээ хамгаалах анхны тулаан байх бөгөөд Коннорыг ялах нь тодорхой” хэмээн өөртөө итгэлтэй мэдэгджээ.
Энэхүү тулаан нь “Ring” байгууллагын ивээл дор зохион байгуулагдаж, Netflix эсвэл DAZN платформоор дэлхий даяар цацагдах магадлалтай байна. Хэдийгээр Гарсиа тулааныг баталж байгаа ч тэрээр сүүлийн долоо хоногуудад хэд хэдэн өөр тамирчныг өрсөлдөгчөөр нэрлэж байсан тул тулаан албан ёсоор баталгаажиж, гэрээ зурагдахыг хүлээх хэрэгтэй байгааг мэргэжилтнүүд сануулж байна.
Коннор Беннийн хувьд энэ нь түүний хөнгөн жингийн ангилалд эргэн ирж, карьерынхаа хамгийн том тулааныг хийх алтан боломж юм.
