“Starbucks” компани хиймэл оюун ухааны салбарт тэргүүлэгч “ChatGPT”-тэй хамтран ажиллахаар болсноо зарласан нь олон нийтийн зүгээс багагүй шүүмжлэл дагуулаад байна. Шинэ үйлчилгээний хүрээнд хэрэглэгчид “ChatGPT” аппликейшн дотор “@Starbucks” гэж бичих замаар өөрийн сэтгэл санааны байдал, тухайн үеийн зорилгодоо тохирсон ундааны зөвлөмж болон тусгай урамшууллуудыг авах боломжтой болох аж.
Компанийн мэдэгдсэнээр хэрэглэгчид “Өглөөг эрч хүчтэй эхлүүлэх ундаа санал болго” гэх мэт энгийн хүсэлтээс гадна “Миний өнөөдрийн хувцаслалтад ямар ундаа тохирох вэ?” гэх мэт сонирхолтой асуултуудыг чатботод тавьж болох юм. “Starbucks”-ын зүгээс энэхүү алхмаа хэрэглэгчдэд урамшуулал хайх ажлыг хөнгөвчилж, сонголт хийх явцыг “ямар ч хүчин чармайлтгүй” мэт хялбар болгоно гэж тайлбарлаж байна.
Гэвч энэхүү хамтын ажиллагааг шүүмжлэгчид таагүй хүлээн авч байна. Тэдний үзэж буйгаар, уг үйлчилгээ нь хүн төрөлхтнийг өөрөө шийдвэр гаргах чадваргүй, “сүнсгүй хоосон аяга” мэтээр харуулж буй хачирхалтай алхам гэв. Зарим шүүмжлэгчид “Хэрэв хэн нэгэнд ундаа сонгоход хиймэл оюун ухааны тусламж үнэхээр хэрэг болж байгаа бол тэр хүн кофе уух биш, сэтгэл зүйчид хандах хэрэгтэй” хэмээн хатуухан хошигножээ.
Технологийн энэ мэт хэтрэлт нь хэрэглэгчдэд туслахаас илүүтэй тэдний өдөр тутмын энгийн сонголтыг хүртэл алгоритмд даатгаж байгаа нь шүүмжлэлийн гол бай болоод байна.
