Америкийн АэроВижн компани алдарт Switchblade цувралын технологи дээр суурилсан Mayhem 10 хөөргөх төхөөрөмж болон нисгэгчгүй онгоцны шинэ загварыг олон нийтэд танилцууллаа. Энэхүү шинэ загвар нь орчин үеийн олон төрлийн цэргийн ажиллагаанд зориулагдсан бөгөөд уламжлалт нисгэгчгүй онгоцнуудаас тактикийн хувьд илүү өргөн боломжийг олгож байгаа юм.
Mayhem 10 нь модульчлагдсан бүтэцтэй тул байлдааны нөхцөл байдал, тавигдаж буй шаардлагаас хамааран хэдхэн минутын дотор даалгаврын төрлөө өөрчлөх боломжтойгоороо онцлог юм. Уг дрон нь 100 км орчим зайд нисэж, 50 минутын турш агаарт байх чадвартай. Мөн “AV_Halo Command” системээр тоноглогдсон тул олон тооны дронууд нэгэн зэрэг бүлэглэн ажиллах (swarming) боломжтой бөгөөд энэ нь байлдааны талбайн хяналт болон дайралтын үр нөлөөг үлэмж нэмэгдүүлдэг байна.
Тус компани жилд 2000 ширхэг Mayhem 10 онгоц үйлдвэрлэх хүчин чадалтай бөгөөд АНУ-ын Армийн “LE-SR” хөтөлбөрийн хүрээнд нийлүүлэлт хийхээр төлөвлөж байгаа аж. Хиймэл оюун ухаанд суурилсан удирдлагын систем болон кибер халдлагаас хамгаалагдсан харилцаа холбооны сувгаар тоноглогдсон нь байлдааны хүнд нөхцөлд ямар нэгэн сааталгүй ажиллах баталгаа болж байна.
Mayhem 10-ийн гол давуу тал нь түүний олон талт байдалд оршиж байгаа юм. Уг төхөөрөмж нь зөвхөн цохилт өгөхөөс гадна тагнуул, хяналт, электрон дайралт болон харилцаа холбоог дэмжих зэрэг төрөл бүрийн үүрэг гүйцэтгэж чадна. Компанийн удирдлагуудын үзэж буйгаар энэхүү технологи нь цэргийн ажиллагааны хугацааг богиносгож, цэргүүдийн амь насыг эрсдэлд оруулахгүйгээр даалгавар биелүүлэхэд шийдвэрлэх үүрэг гүйцэтгэх юм.
