Ойрхи Дорнод дахь хурцадмал байдал намжиж, Ирантай хийх хэлэлцээ ахицтай үргэлжлэх найдвар төрснөөр дэлхийн зах зээлд нефтийн үнэ буурч, эдийн засаг сэргэх төлөв ажиглагдаж байна. АНУ болон Иран улсуудын хооронд тогтоосон түр гал зогсоох хэлэлцээрийг сунгах боломжтой тухай Ерөнхийлөгч Дональд Трампын мэдэгдэл, мөн Израиль болон Ливаны хооронд 10 хоногийн хугацаатай гал зогсоох тохиролцоо хэрэгжиж эхэлсэн нь геополитикийн нөхцөл байдалд эерэг нөлөө үзүүллээ. Үүний улмаас Brent маркийн нефтийн үнэ 94.79 ам.доллар хүртэл буурсан бол АНУ-ын WTI нефть 91.28 ам.долларт хүрч хямдарсан нь эрчим хүчний импортлогч орнуудын хувьд таатай мэдээ болов.
Азийн хувьцааны зах зээлүүдийн хувьд АНУ-ын Уолл Стрийт түүхэн дээд амжилтаа шинэчилсэн хэдий ч ашиг тооцох арилжааны нөлөөгөөр зарим индексүүд уналттай гарлаа. Тухайлбал, Токиогийн Nikkei индекс 0.7 хувиар, Өмнөд Солонгосын Kospi 0.43 хувиар тус тус буурсан байна. Гэсэн хэдий ч MSCI Ази-Номхон далайн бүсийн хувьцааны индекс Ираны мөргөлдөөн эхэлснээс хойших хамгийн өндөр түвшиндээ ойртож, 4-р сард нийт 14.5 хувиар өссөн нь хөрөнгө оруулагчдын итгэл сэргэж буйг харуулж байна.
Гэвч олон улсын шинжээчид зах зээлийн энэхүү хурдацтай сэргэлтийн цаана томоохон эрсдэл нуугдаж байгааг анхааруулсаар байна. Хэрэв стратегийн чухал ач холбогдолтой Хормузын хоолой дахин хаагдах эсвэл хэлэлцээ амжилтгүй болбол нефтийн үнэ огцом өсөж, дэлхийн эдийн засагт хямрал дагуулж болохыг Олон улсын валютын сан болон Олон улсын эрчим хүчний агентлаг онцолжээ. Энэхүү тодорхойгүй байдал нь ялангуяа Европын агаарын тээврийн салбарт шууд нөлөөлж, үйл ажиллагаанд саатал учруулж болзошгүйг шинжээчид сануулж байна.
