“The Brutalist” киногоороо Оскарт нэр дэвшиж, ихээхэн амжилт олсон найруулагч Брэди Корбет дараагийн төслөө “Америкийн далдын шүтлэг болон ид шидийн түүх” (American Mysticism & Occult History) сэдвээр хийхээр төлөвлөж байна. Тэрээр саяхан Дублин хотод болсон арга хэмжээний үеэр шинэ бүтээлийнхээ талаар дэлгэрэнгүй мэдээлэл өгөхдөө, уг төсөл дээрээ Америкийн нэрт ид шид судлаач, түүхч Митч Хоровицтой хамтран ажиллаж байгаагаа онцолжээ. Тэрээр Америк дахь нууц бүлгэмүүд, шүтлэг бишрэлийн тогтолцооны шилжилт хөдөлгөөний талаар маш их судалгаа хийж байгаагаа дурдсан байна.
“The Origin of the World” нэртэй байж магадгүй гэгдэж буй энэхүү шинэ кинонд алдарт жүжигчин, дуучин Селена Гомез гол дүрд тоглохоор яригдаж байгаа нь олны анхаарлыг татаад байна. Найруулагчийн зүгээс шинэ киногоо 70мм хальсанд буулгах бөгөөд 200 орчим хуудас зохиолтой, 4 цаг орчим үргэлжлэх, өмнөх бүтээлүүдээсээ ч илүү өргөн цар хүрээтэй, зоримог (NC-17 үнэлгээтэй байж магадгүй) бүтээл болохыг сануулжээ. Киноны үйл явдал Хойд Калифорни дахь цагаачдын амьдралаас эхлэн 150 гаруй жилийн түүхийг хамарсан “horror-western” хэв маягтай байх бөгөөд зураг авалтыг ирэх зун Португал болон Өмнөд Африкт хийхээр төлөвлөж байгаа ажээ.
