“Ливерпүүл” клуб Аваргуудын лигт “Пари Сен-Жермен”-д хожигдсоноор энэ улирлыг цомгүй дуусгах нь тодорхой болсон ч ерөнхий дасгалжуулагч Арне Слот багийнхаа ирээдүйд итгэлтэй хэвээр байна. Премьер лигийн хүснэгтийн тавдугаар байрт бичигдэж, Европын тавцанд ялагдал хүлээсэн “улаанууд”-ын хувьд энэ улирал амаргүй өнгөрч байгаа ч Слот ирэх зуны наймааны цонхоор багаа улам чанаржуулна гэдгээ мэдэгдлээ.
Тэрээр багийн бүрэлдэхүүнд өөрчлөлт орж, зарим тоглогчид явах ч шинээр ирэх хүчнүүд багийг бэхжүүлнэ гэж үзэж байна. Сүүлийн дөрвөн наймааны цонх дамнан “Ливерпүүл” 150 сая фунт стерлингийн хөрөнгө оруулалт хийгээд байгаа юм.
Багийн бүрэлдэхүүний хувьд таагүй мэдээ байгаа нь довтлогч Уго Экитик ПСЖ-тэй хийсэн тоглолтын үеэр Ахиллесийн шөрмөсөө хүнд гэмтээж, ирэх Дэлхийн аварга шалгаруулах тэмцээнийг өнжихөөр болжээ. Слот түүнийг илүү хүчирхэг болоод эргэн ирнэ гэдэгт найдаж байгаагаа илэрхийлэв. Харин эерэг мэдээ нь, хөлний хугарлын улмаас удаан хугацаанд талбайд гараагүй Александр Исак ирэх ням гарагт болох “Мерсисайдын дерби” буюу “Эвертон”-ы эсрэг тоглолтод оролцох боломжтой болсон байна. Тэрээр шууд 90 минут тоглоход хараахан бэлэн биш байгаа тул Слот түүний оронд Коди Гакпо, Федерико Кьеза нарыг ч мөн ашиглахаа онцолжээ.
