Зургаа дахь жилдээ үргэлжилж буй Мьянмарын иргэний дайны явцад нэгэн харамсалтай дүр зураг ажиглагдаж байгаа нь цэргийн засаглалынхан олзлогдсон өөрсдийн цэргүүдээ давтан бөмбөгдөж буй явдал юм. Цэрэг элсүүлэхэд хүндрэлтэй байгаа армийн хувьд энэ нь эрх мэдлээ хадгалахын тулд бүх зүйлийг золиослоход бэлэн байгааг харуулж байна. Одоогийн байдлаар Үндэсний эв нэгдлийн Засгийн газрын Ардын хамгаалалтын хүчин болон холбоотны үндэстний армиуд тодорхой ахиц гаргасан ч дайны нөхцөл байдал ерөнхийдөө гацаанд ороод байна.
2021 оны хоёрдугаар сард цэргийнхэн сонгуулийн будлиан гэх үндэслэлгүй шалтгаанаар иргэний засгийн газрыг түлхэн унагаснаар энэхүү мөргөлдөөн эхэлсэн юм. Түүх сөхвөл, Мьянмарын цэргийнхэн 1962 оноос 2015 он хүртэл улс орныг удирдаж байсан туршлагатай. Өнөөдрийн байдлаар мөргөлдөөний улмаас 90,000 гаруй хүн амь үрэгдэж, 3 сая гаруй иргэн орон гэргүй болоод байна. Хэдийгээр цэргийн засаглал томоохон хотуудыг хяналтдаа байлгаж байгаа ч улс орны нийт нутаг дэвсгэрийн дөнгөж тавны нэгийг л хянаж байгаа ажээ.
Эсэргүүцэгч хүчнийхэнд тулгарч буй хоёр гол саад бэрхшээл байна. Нэгдүгээрт, тэдний эзэлсэн стратегийн хотуудыг цэргийнхэн БНХАУ болон Оросоос нийлүүлсэн нисэх онгоц, дроноор бөмбөгдөж, ухрахад хүргэдэг. Хоёрдугаарт, эсрэг талын хүчнүүд нэгдмэл бус байсан явдал юм. Гэвч саяхан байгуулагдсан нэгдсэн удирдах зөвлөл нь эсэргүүцэгч талуудыг нэгтгэж чадсан тул удахгүй илүү зохион байгуулалттай давшилт хийхээр бэлтгэж байна.
Шинжээчдийн үзэж буйгаар, эсэргүүцэгч хүчнүүд ялах магадлал улам бүр нэмэгдэж байгаа бөгөөд хэрэв тэд давамгайлж эхэлбэл БНХАУ өөрийн дэмжлэгээ цэргийн засаглалаас Үндэсний эв нэгдлийн Засгийн газар руу шилжүүлэх төлөвтэй байна. Энэхүү геополитикийн шилжилт болон эсэргүүцэгч талуудын нэгдэл нь Мьянмарын ирээдүйн хувь заяанд шийдвэрлэх үүрэг гүйцэтгэхээр байна.
