OpenAI-ийн гүйцэтгэх захирал Сэм Олтманы үүсгэн байгуулсан “World” төсөл Tinder аппликэйшнтэй хамтран, хэрэглэгчдийг бодит хүн гэдгийг нь батлах дижитал “баталгаажсан хүн” тэмдэгтийг нэвтрүүлж эхэллээ. Хэрэглэгчид “Orb” хэмээх тусгай төхөөрөмжөөр нүдээ скан хийлгэснээр энэхүү баталгааг авах боломжтой бөгөөд энэ нь тус төслийн хувьд олон нийтэд хүртээмжтэй болох томоохон туршилт болж байна.
“World” төслийн үндсэн зорилго нь хиймэл оюун ухааны (AI) хурдацтай хөгжлийн эрин үед цахим ертөнцөд бодит хүн болон хиймэл оюун ухааны ботуудыг хооронд нь ялгахад оршино. Хэдийгээр тус компани өгөгдөл хамгаалалтын хууль тогтоомжтой холбоотойгоор зарим улс орны зүгээс шалгалттай тулгарч байсан ч, одоогийн байдлаар дэлхийн хэмжээнд 18 сая орчим хүн “Orb” төхөөрөмжөөр дамжуулан баталгаажуулалт хийлгээд байна.
Төслийн эцэг компани болох “Tools for Humanity” нь үйл ажиллагаагаа зөвхөн болзооны аппликэйшнээр хязгаарлахгүй, Zoom видео хурлын платформ болон Docusign гэрээ байгуулах програм хангамжтай хамтын ажиллагаагаа өргөжүүлжээ. Ингэснээр эдгээр платформын хэрэглэгчид “World ID”-аар дамжуулан өөрсдийн цахим баталгааг шаардах боломжтой болсон юм. Мөн Reddit платформ бот болон жинхэнэ хэрэглэгчдийг ялгах шийдэл болгон “World”-ийг туршиж эхэлжээ.
Түүнчлэн тус төсөл урлаг сонирхогчдод зориулсан “Concert Kit” хэмээх шинэ хэрэгслийг нэвтрүүлж байна. Энэхүү хэрэгсэл нь бот худалдаачдаас үүдэлтэй билетний үнийн хөөрөгдлийг бууруулах зорилготой бөгөөд Бруно Марсын аялан тоглолтын үеэр туршигдахаар төлөвлөгджээ.
2023 онд анх танилцуулагдсан уг төсөл нь нүд сканнердсаны дараа “World ID” буюу хувь хүний өвөрмөц криптограф түлхүүрийг бий болгодог. Анх “Worldcoin” нэртэй байсан тус төсөл нь криптовалютын салбараас илүүтэйгээр онлайн орчинд хувь хүний нууцлалыг хадгалсан төвлөрсөн бус танилт баталгаажуулалтад гол анхаарлаа хандуулах болжээ.
