Шинэ судалгаагаар сансрын хамгийн аварга биетүүд болон бүтэц нь ч эртний физикийн үндсэн хуулиудыг ягштал дагаж мөрддөгийг батлав. Олон улсын эрдэмтдийн баг таталцлын хуулийн талаарх хоёр туйлалт үзэл баримтлалыг шийдвэрлэх зорилгоор хийсэн энэхүү томоохон судалгаагаараа эртний физикийн ойлголтууд хамгийн төвөгтэй ажиглалтуудад ч хүчинтэй хэвээр байгааг тогтоожээ.
“Physical Review Letters” сэтгүүлд нийтлэгдсэн уг бүтээлд эрдэмтэд Альберт Эйнштейний ерөнхий харьцангуйн онолыг (түүний суурь болох Исаак Ньютоны таталцлын үндсэн хуулийн хамт) сансрын бодит ажиглалтуудтай харьцуулан шалгасан байна. Энэхүү дүгнэлт нь 1970-аад оноос хойш зарим тайлбарлахад бэрх үзэгдлүүдийг тайлбарлахын тулд таталцлын хуулийг өөрчлөх гэсэн оролдлого болон хувилбар онолуудыг няцааж байгаа юм.
Харагдахгүй нэмэлт зүйл буюу харанхуй бодис
Эрдэмтдийн үзэж буйгаар үндсэн зарчмууд нь зөв боловч бидний хараагүй “нэмэлт зүйл” байгаа нь тодорхой болжээ. Тэрхүү нэмэлт хүчин зүйл нь сансрын массын 85%-ийг эзэлдэг гэж үздэг үл үзэгдэх “харанхуй бодис” байх магадлалтай юм.
1970-аад онд сансар судлаач Вера Рубин галактикийн эргэлтийн хурд таталцлын хуулийг зөрчиж байгаа мэт ажиглалтыг анх хийсэн байдаг. Ньютоны хуулиар галактикийн төвөөс алслагдсан оддын хурд удаан байх ёстой ч, Рубиний ажиглалтаар захын оддын хурд нь төвийнхтэй адил хурдан байв. Энэхүү гажгийг тайлбарлахын тулд таталцлын хууль алдаатай биш, харин тэнд харагдахгүй масс (харанхуй бодис) байгаа учраас таталцлын нөлөө үзүүлж байна гэх таамаглал ийнхүү улам батжиж байна.
Нарийвчилсан судалгаа ба үр дүн
Атакама сансрын телескоп (ACT) болон Слоун Дижитал Тэнгэрийн Судалгааны (SDSS) мэдээлэлд тулгуурлан эрдэмтэд “Их тэсрэлт”-ээс 380,000 жилийн дараа үүссэн эртний гэрлийн эх үүсвэрийг судалжээ. Уг гэрэл аварга том галактикийн бөөгнөрлүүдийг дайран өнгөрөхөд таталцлын нөлөөгөөр бага зэрэг муруйж байсан бөгөөд судлаачид хэдэн зуун мянган галактикийн бөөгнөрөл дундуурх энэхүү бичил өөрчлөлтийг хэмжсэн байна.
Тооцооллын үр дүн Ньютон болон Эйнштейний онолуудын таамаглалтай бараг л яв цав таарчээ. Хэдийгээр зарим эрдэмтэд харанхуй бодисын оршин тогтнолд эргэлздэг ч, энэхүү судалгаа нь:
- Таталцлын хууль сансрын бүх түвшинд (хамгийн жижгээс хамгийн том бүтэц хүртэл) хэрэглэгддэг.
- Харанхуй бодисын оршин тогтнолыг дэмжих шинжлэх ухааны нэмэлт нотолгоо болж байна.
Ийнхүү бидний өдөр тутам мэдэрдэг таталцлын зарчмууд тэрбум тэрбум гэрлийн жилийн алслагдсан орон зайд ч өөрийн хүчин төгөлдөр байдлаа хадгалсаар байгааг шинжлэх ухаан дахин нэгэнтээ баталлаа.
