АНУ-ын Ерөнхийлөгч Дональд Трамп Хормузын хоолойн асуудлаар НАТО-г хүчтэй шүүмжилж, тус холбоо тусламж үзүүлэх саналаа дэндүү хожимдуулж тавьсан хэмээн мэдэгдлээ. Энэхүү байр суурь нь олон улсын харилцаа, тэр дундаа холбоотнуудын итгэлцэлд тодорхой хэмжээний нөлөө үзүүлэхээр байна.
Аризона мужид болсон арга хэмжээний үеэр Трамп хэлэхдээ: “Бидэнд хоёр сарын өмнө тусламж хэрэгтэй байсан, харин одоо тэдний хэрэг алга. Хэрэгцээтэй үед тэд туйлын ашиггүй байсан” хэмээн онцолжээ. Тэрээр АНУ цаашид гадны улс орон, эх үүсвэрт найдах бус, зөвхөн өөрсдийн хүчинд итгэх ёстой гэсэн хатуу байр суурийг илэрхийлсэн байна.
Хормузын хоолойг нээлттэй байлгах асуудлаар талуудын мэдээлэл зөрүүтэй байна. Ираны тал хэлэлцээрийн хугацаа дуустал арилжааны хөлөг онгоцуудад хоолойг нээлттэй байлгана гэж мэдэгдсэн. Гэвч Ерөнхийлөгч Трамп “Ирантай хийсэн гэрээ 100 хувь биелэх хүртэл АНУ-ын тэнгисийн цэргийн бүслэлт үргэлжилнэ” гэдгийг анхаарууллаа. Мөн тэрээр Ираныг баяжуулсан уран үйлдвэрлэхээс татгалзсан гэж мэдэгдсэн боловч Ираны тал үүнийг эрс няцаагаад байна.
НАТО болон АНУ-ын бусад холбоотнууд Ираны боомтууд дахь бүслэлтэд нэгдэхээс татгалзсан. Харин Их Британийн тал АНУ-ын цэргүүдэд хамгаалалтын зорилгоор өөрийн баазуудыг ашиглах зөвшөөрөл олгожээ. Трамп энэ үеэр Пакистан, Саудын Араб, Катар, АНЭ, Бахрейн, Кувейт зэрэг улсуудын удирдагчдыг магтаж, тэдний гаргасан зоригийг сайшаасан байна.
Трамп өөрийн засаглалын хугацаанд олон дайныг зогсоосон гэх мэдэгдлээ дахин бататгав. Тэрээр Иран болон Ливаны асуудлыг шийдвэрлэснээр “10 дайны төгсгөл ирж, олон сая хүний амь аврагдана” гэж үзэж байгаагаа илэрхийлжээ. Мөн Венесуэлд явуулсан цэргийн ажиллагааны дараа тус улстай “агуу түншлэл” тогтоосон гэдгээ онцлон тэмдэглэсэн байна.
