Riot Games компанийн тулаант төрлийн шинэ тоглоом болох “2XKO”-д техникийн ноцтой алдаа гарч, тэмцээн зохион байгуулагчид болон дамжуулагчдад хүндрэл учруулж эхэллээ. Сүүлийн шинэчлэлтээр Акали хэмээх шинэ дүр нэмэгдсэн ч онлайн тоглолтын үеэр ачааллын дэлгэц дээр гацах, улмаар тоглоом шууд хаагдах алдаа гарах болжээ. Riot Games уг асуудлыг тоглоомын үзэгчийн (spectating) горимтой холбоотой болохыг тогтоож, тус функцийг түр хугацаагаар идэвхгүй болгосон байна. Энэ нь шууд дамжуулалт болон тэмцээнүүдэд сөргөөр нөлөөлж байгаа тул компани тусгай маягт бөглөсөн зохион байгуулагчдад “хурдан хугацаанд зөвшөөрөл олгох” замаар асуудлыг шийдвэрлэхээ мэдэгджээ.
Гуравдугаар сарын сүүлээс эхлэн Riot Games “Community Events Program”-ийг эхлүүлсэн нь орон нутгийн болон онлайн тэмцээнүүдийг дэмжих, оролцогчдод 2,000 хүртэлх Кредит олгох зорилготой байв. Энэ нь тулаант тоглоомын сонирхогчдын хүрээлэлд байр сууриа олж чадахгүй байгаа “2XKO”-г идэвхжүүлэх гэсэн алхам гэж харагдаж байна. Учир нь тус тоглоом анхны төлөвлөсөн шиг өргөн тархалт авч чадаагүй байгаа юм.
Хэдийгээр “League of Legends”-ийн дүрүүдэд суурилсан ч “2XKO” хүлээлтэд хүрээгүй гэж шинжээчид үзэж байна. Хэт өндөр үнэтэй арьс борлуулалтад гаргасан нь тоглогчдын дургүйцлийг төрүүлж, санхүүжилтийн асуудлаас болж Riot Games тус тоглоом дээр ажиллаж байсан олон ажилтнаа цомхотгосон юм. Нэгэн мэргэжлийн тоглогч “Тоглоомын механикт хэт анхаарч, дэлгүүрийн үнэ болон FOMO тактикт хэт туйлширсан нь League-ийн баатруудад дуртай хүмүүсийг хүртэл түлхэж байна” хэмээн шүүмжилсэн байна. Одоо үүсээд буй үзэгчийн горимын асуудал нь Riot Games-ийн хувьд байдлыг улам хүндрүүлж, ашиг олох боломжийг нь хязгаарлаж байна.
