Америкийн Холбооны Мөрдөх Товчооны (FBI) захирал Кэш Пателийн талаар “The Atlantic” сэтгүүлд нийтлэгдсэн шуугиан тарьсан нийтлэл Вашингтоны улс төрийн хүрээнд томоохон маргаан дэгдээгээд байна. Тус сэтгүүлийн сурвалжлагч Сара Фитцпатрикийн бичсэн нийтлэлд Пателийг архинд хэт их автдаг, ажлын хариуцлага алддаг, улмаар үндэсний аюулгүй байдалд эрсдэл учруулж болзошгүй хэмээн дурджээ.
“The Atlantic” сэтгүүлийн мэдээлснээр, Кэш Патель Вашингтон болон Лас Вегасын хувийн клубүүдэд хэтрүүлэн согтдог бөгөөд энэ нь түүнийг ажил үүргээ гүйцэтгэх, ялангуяа яаралтай нөхцөл байдалд бэлэн байхад саад болдог гэжээ. Түүнчлэн компьютерийн системийн техникийн алдаанаас болж “намайг ажлаас халлаа” хэмээн сандран туслахууд руугаа утасдсан гэх мэт түүний сэтгэл зүйн тогтвортой байдалтай холбоотой мэдээллүүд багтсан байна.
Хамгийн ноцтой нь, хамгаалалтын албаныхан согтуурсан үед нь түүнийг сэрээхэд хүндрэлтэй байсан, мөн зарим тохиолдолд түүнийг байрлаж буй өрөөнөөс нь гаргахын тулд тусгай багаж хэрэгсэл (breaching equipment) ашиглах хүртэл санал гарч байсан гэх мэдээлэл нийтлэлд дурдагджээ.
Захирал Кэш Патель болон түүний өмгөөлөгч Жесси Биннал нар эдгээр бүх мэдээллийг “бүрэн худал бөгөөд гүжирдлэг” хэмээн няцааж, сэтгүүлийг шүүхэд өгөхөөр бэлтгэж байна. Пателийн зүгээс нийтлэл гарахаас өмнө сэтгүүлд анхааруулга хүргүүлсэн бөгөөд уг материалыг “зохиомол гүтгэлэг” гэж нэрлэжээ.
Өмгөөлөгч Биннал “Тэднийг худал мэдээлэл тарааж буйг нь урьдчилан сануулсаар байтал нийтлэлээ гаргасан. Бид шүүх дээр уулзах болно” хэмээн мэдэгдсэн байна. Харин сэтгүүлч Сара Фитцпатрик өөрийн нийтлэлээ 20 гаруй эх сурвалжийн баталгаатай мэдээлэлд үндэслэсэн бөгөөд үг бүрийнхээ төлөө хариуцлага хүлээнэ гэдгээ илэрхийлжээ.
Энэхүү үйл явдал нь Трампын засаг захиргааны томилсон гол албан тушаалтнуудын нэг болох Кэш Пателийн нэр хүнд болон FBI-ийн удирдлагын тогтвортой байдалд эргэлзээ төрүүлж эхлэв. Хэдийгээр FBI-ийн Олон нийттэй харилцах алба эдгээр мэдээллийг 100 хувь худал гэж мэдэгдэж байгаа ч Конгрессын зарим гишүүд Пателийн томилолт болон ёс зүйн байдалд анхаарал хандуулахыг шаардаж байна.
