Украйны Ерөнхийлөгч Владимир Зеленский ОХУ-ын зүгээс Беларусь улсыг дайнд дахин татан оролцуулах бэлтгэл хийж байна гэж мэдэгдлээ.
Украйны Зэвсэгт хүчний жанжин штабын тагнуулын мэдээллээр, Беларусийн хил орчмоос Украйны чиглэлд зам тавих болон артиллерийн байрлал тогтоох үйл ажиллагаа явуулж байгаа нь ажиглагдсан байна. Үүнтэй холбогдуулан Киев Беларусийн удирдлагуудад “Украйн газар нутаг, тусгаар тогтнолоо хамгаалахад бэлэн байгаа” гэдгээ албан ёсоор илэрхийлжээ.
Шинжээчдийн үзэж буйгаар, ОХУ нь цэргийн хүчний зохион байгуулалтаа өөрчилж, боловсон хүчний хомсдолыг нөхөх зорилгоор ийнхүү Беларусийн хил дээр цэргийн идэвхжилээ нэмэгдүүлж байж болзошгүй юм.
Беларусь улс нь ОХУ-тай стратегийн нягт харилцаатай бөгөөд Александр Лукашенкогийн удирдлага дор 2022 оны 2 дугаар сард ОХУ-ын Украйн руу хийсэн бүх талын довтолгоонд өөрийн нутаг дэвсгэрийг ашиглах боломжийг олгож байсан билээ. Хэдийгээр Лукашенко Беларусийн цэргүүдийг дайнд шууд оролцуулахгүй гэж мэдэгдэж байгаа ч, ОХУ-ын тактикийн цөмийн зэвсэг болон гиперсоник “Oreshnik” пуужингуудыг нутагтаа байрлуулахаар тохиролцоод байна.
АНУ-ын зүгээс сүүлийн үед Беларусийн талтай харилцаагаа сайжруулахыг эрмэлзэж, 250 хоригдлыг сулласан ч, тус улсын удирдлагуудад хориг арга хэмжээг тойрч гарахгүй байх болон Украйнд үзүүлэх дарамт шахалтаа нэмэгдүүлэхгүй байхыг хатуу анхааруулжээ.
