АНУ-ын Ерөнхийлөгч Дональд Трамп Иран улстай хэлэлцээр хийх нөхцөлийг бүрдүүлэхийн тулд зориуд тогтворгүй, доромжилсон мэт сэтгэгдэл төрүүлэхүйц сошиал медиа бодлого баримталж байсан талаар “The Wall Street Journal” мэдээллээ. Тэрээр өөрийн гаргаж буй этгээд үйлдлүүд болон хатуу мэдэгдлүүд нь Иранчуудыг буулт хийхэд хүргэнэ гэж тооцоолсон байна.
Ерөнхийлөгч Трампын энэ сард Ираны стратегийн чухал ач холбогдолтой Ормузын хоолойн талаар гаргасан зарим мэдэгдэл нь уг бодлогын илрэл байсныг албаны эх сурвалжууд онцолжээ. Тухайлбал, тэрээр 5-р сарын 5-ны өдөр Ормузын хоолойг нээх тухай маш хатуу, бүдүүлэг үг хэллэг ашиглан жиргэсэн бөгөөд дараа нь “Аллахын алдар суу” хэмээн бичсэн нь олныг гайхшруулсан юм. Мөн 4-р сарын 7-нд Иран улс хоолойг нээхгүй бол “бүхэл бүтэн соёл иргэншил мөхөх болно” хэмээн сүрдүүлсэн байдаг.
Эдгээр мэдэгдлүүд нь улс төрийн хүрээнийхэн болон шашны удирдагчдаас хүчтэй шүүмжлэл дагуулж, Конгрессын гишүүд Цагаан ордноос тайлбар авахаар хандахад хүргэсэн байна. Нэгэн зөвлөх нь энэ талаар асуухад Трамп өөрөө Аллахыг магтсан нь Иранчуудад илүү шууд бөгөөд доромжилсон байдлаар хандаж, тэдний анхаарлыг татаж хэлэлцээрт урих зорилготой байсан гэж тайлбарлажээ.
Сонирхолтой нь, Ерөнхийлөгчийн эдгээр жиргээнүүд нь Үндэсний аюулгүй байдлын багийнхны мэдэлгүйгээр хийгдсэн бөгөөд ямар нэгэн албан ёсны төлөвлөгөөний хүрээнд хийгдээгүй гэж албаны эх сурвалж мэдээлсэн байна. Энэхүү гэнэтийн бөгөөд “тогтворгүй” мэт харагдах тактик нь консерватив хэвлэл мэдээллийн зарим төлөөлөгчдөөс ч шүүмжлэл хүртээд байна.
