Тэнгэрт ямар нэгэн тайлбарлагдашгүй биет эсвэл гэрэл харагдах бүрийд интернэт орчинд нэгэн хуучин онол “амилдаг” нь Канадын сэтгүүлч Серж Монастын 1990-ээд оны эхээр боловсруулсан “Blue Beam” (Цэнхэр туяа) төсөл юм. Энэхүү онол нь НҮБ, НАСА зэрэг хүчирхэг байгууллагууд дэвшилтэт технологи ашиглан “Шинэ дэлхийн дэг журам” тогтоож, хүн төрөлхтнийг нэгдсэн нэг шашин, нэг засгийн газарт захируулахаар нууцаар төлөвлөж байна гэх итгэл үнэмшил дээр тогтдог.
Монастын үзэж байснаар энэхүү ажиллагаа нь дөрвөн үндсэн үе шаттайгаар явагдах байв. Эхний шатанд дэлхийн тодорхой цэгүүдэд хиймэл газар хөдлөлт үүсгэж, одоогийн бүх шашны сургаал номлолыг “алдаатай” гэж батлах хуурамч археологийн олдворуудыг илрүүлнэ. Үүний дараа огторгуйд лазер проектор болон хиймэл дагуулын тусламжтайгаар аварга том 3D голограмм дүрүүдийг бүтээнэ. Бүс нутаг бүрийн зонхилох шашинд тохируулан “Бурхан” эсвэл “Мессиа” тэнгэрээс бууж ирж буй мэт дүр зургийг үзүүлж, олон хэлээр зэрэг дуу хоолой сонсгох замаар хүмүүсийг төөрөгдүүлэхээр төлөвлөсөн гэж Монаст бичжээ.
Гурав дахь шатанд маш бага давтамжтай долгионыг ашиглан хүн бүрийн тархинд шууд мессеж илгээж, хүмүүс өөрийнх нь “Бурхан” дотроос нь ярьж байна гэж итгүүлэх замаар сэтгэл зүйн бүрэн хяналтад оруулна. Эцэст нь “Мянган оддын шөнө” хэмээх ажиллагаагаар харийнхны довтолгоо болж буй мэт айдас төрүүлж, цахилгаан хэрэгслээр дамжуулан “ер бусын” аймшигт үзэгдлүүдийг харуулж, хүмүүсийг галзуурлын ирмэгт аваачна.
Ингэснээр айдаст автсан хүн төрөлхтөн амар амгаланг тогтоох “Шинэ дэлхийн дэг журам”-ыг дуртайяа хүлээн зөвшөөрөх болно гэж уг онол өгүүлдэг. Монаст 1996 онд нас барж, түүний таамагласан хугацаанууд хэдийнэ өнгөрсөн ч өнөөгийн хиймэл оюун ухаан, дрон, лазер технологийн үсрэнгүй хөгжил нь ийм төрлийн хуурамч үзэгдэл бүтээх боломжтой гэх айдсыг төрүүлж, уг онолыг интернэт орчинд дахин сэргээх хөрс болсоор байна. Хэдийгээр Монастын хэлсэн зүйлсийг батлах бодит баримт байхгүй ч Blue Beam төсөл нь орчин үеийн хуйвалдааны онолуудын хамгийн алдартай жишээ болон үлджээ.
Дэлгэрэнгүйг эх сурвалжаас харах
↓Эх сурвалжийг нээх ↓
The ideas in this particularly juicy conspiracy theory were considered impossible when it was first proposed, but they are broad enough that they get new life on the internet every now and then.
