Чикаго – Байсангур Сусуркаев UFC-д анхны тулаанаа амжилттай хийж, долоо хоногийн дотор хоёр тулаанд ялалт байгуулсан тухайгаа хуваалцлаа. Тэрээр анхны тулааныхаа мэдрэмж, ойрын ирээдүйд дахин октагон руу гарах хүсэл, мөн Дана Уайттай уулзалтынхаа талаар ярьсан юм.
Сусуркаевийн ур чадвар, тулааны тактик нь түүнийг UFC-д хүчтэй эхлэхэд гол хүчин зүйл болсон. Тэрээр өмнөх карьертаа өчиг боолтоор ялалт байгуулж, техникийн нокаутаар өрсөлдөгчдөө буулгаж байсан туршлагатай. Харин энэ удаагийн ялалт нь түүний хувьд UFC-д шинэ шатанд гарсныг харуулсан бөгөөд Сусуркаев өөрийн ур чадвараа улам сайжруулж, цаашид дэд оргил тулаануудад оролцох зорилготой байгаа юм.
Тулаан эхнээсээ ширүүн өрсөлдөөнтэй өрнөсөн ч Сусуркаевийн хурд, хүч чадал нь ялалтыг авчирсан. Тэрээр эхний үеэс өрсөлдөгчөө дарамталж, хоёрдугаар үед техникийн нокаутаар ялалт байгуулсан. Ялалтын дараах түүний баяр хөөр үзэгчдийг догдлуулж, олон фэнүүдийн хүндэтгэлийг хүртжээ.
Дана Уайттай уулзсаны дараа Сусуркаев UFC-д илүү өндөр амжилт гаргах эрмэлзэлтэй байгаагаа илэрхийлсэн. Тэрээр ойрын хугацаанд дахин октагон руу орох хүсэлтэй байгаа бөгөөд карьераа шинэ төвшинд хүргэхийн тулд улам шаргуу ажиллахаа мэдэгдсэн байна.
Тулаан дууссаны дараах ярилцлагаас хүргэж байна.
– Энэ долоо хоногт хоёр дахь ялалтаа байгууллаа. Биеийн байдал ямар байна вэ?
– Маш сайн, баяртай байна. Тэр ийм хүчтэй байхыг би төсөөлөөгүй. Жаахан ядарсан ч бэлтгэлдээ ороход асуудалгүй.
– Эхний үе үнэхээр өрсөлдөөнтэй өнгөрсөн. Тэр үеийн дараа юу бодсон бэ?
– Би хоёрдугаар, гуравдугаар үед тулалдахад бэлэн байсан. Бэлтгэлийн танхимд ч ийм нөхцөл байнга тохиолддог шүү дээ.
– Чи түүний хөлийг хөнгөн өшиглөлтөөр гэмтээсэн. Тэр хүртэл өвдгөндөө хүрч байсан. Үүнийг мэдсэн үү?
– Тийм ээ, гэмтсэнийг нь мэдсэн даруйдаа ялалт минийх гэдгийг ойлгосон.
– Энэ жил хэдэн тулаан хийхээр төлөвлөж байна вэ?
– Доод тал нь нэг, магадгүй хоёр тулаан.
– Хаана тулалдахыг хүсэж байна? Абудаби эсвэл Нью-Йорк?
– Абудабид тулалдахыг хүсэж байна, гэхдээ баримт бичгийн асуудлаас болж АНУ-аас гарах боломжгүй. Тиймээс Нью-Йоркт ч байж болно. Гэхдээ одоогоор хөлний бэртэлтэй тул жаахан хугацаа авч эмчлүүлээд, бүрэн бэлэн болох хэрэгтэй.
– Сүүлийн 4 хоногт хоёр ялалт байгууллаа. Гэнэтхөн нэмэгдсэн алдар нэрийг яаж хүлээж авч байна вэ?
– Эхний тулааны дараа олон хүн холбогдож, их дэмжлэг үзүүлсэн. Одоо бүр их байх болов уу. Би баярлаж байгаа, гэхдээ миний хувьд хамгийн чухал нь гэр бүлдээ туслах явдал. Фанатууд өнөөдөр магтаж болно, маргааш муу хэлж ч магадгүй. Тиймээс тэр нь төдийлөн чухал биш.
– Чи саяхан Дана Уайтаас ямар нэгэн үг сонсов уу?
– Тэр ирээд “Маш сайн тулаан болсон” гэж баяр хүргэсэн.
– Харин Хамзат чамайг жаахан галзуухан, бүр өөрөөсөө илүү гэж хэлсэн байна. Энэ үг чамд ямар санагдсан бэ?
– Маш их баяртай байна. Гэхдээ бүгд ойлгож байгаа, би түүнээс дээр биш. Тэр бол миний ах, хамгийн шилдэг нь. Би түүнд зөвхөн амжилт хүсье. Хамзат бол хамгийн шилдэг.
– Албан ёсны жингийн үзлэг дээр өрсөлдөгчийнхөө толгойг татаж, нүүр тулсан. Энэ нь анхаарал татах зорилготой байсан уу?
– Үгүй ээ. Тэр надад “чи Хамзатын жижиг дүү” гэж хэлсэн. Би тэр америк слэнгийг ойлгоогүй, дараа нь тайлбарлаж өгсөн. Тэгээд маш их уурласан, тэр үед л ийм зүйл болсон.
– Сүүлийн зургаан хоногт гайхалтай зам тууллаа. Ирэх жил өөрийгөө хаана харж байна вэ?
– Хоёрхон жилийн өмнө Америкт ирсэн. Маш хүнд байсан, олон ажил зэрэг хийж, тууштай хөдөлмөрлөсөн. Хамгийн хэцүү нь хүлээх, найдлага тавих байсан. Олон удаа буцаж нутаг руугаа явах гэж бодсон ч ойр дотны хүмүүс минь “битгий бууж өг” гэж зоригжуулсан.
Түүний ярианаас харахад бэрхшээл, сорилтыг давж, тууштай байсны үр дүнд өнөөдрийн ялалтууд иржээ. Хэдий хөлний бэртэлтэй байгаа ч ойрын хугацаанд эдгэрч, дахин тулалдах зорилготой байна.
Эх сурвалж:
