НБА-гийн түүхэн дэх агуу довтлогчдын нэг, өдгөө “Хьюстон Рокетс” багийн лидер Кевин Дюрант өөрийн карьер төгсгөлийн шатандаа орж буйг илэн далангүй хүлээн зөвшөөрлөө. Саяхан өгсөн ярилцлагадаа тэрээр зодог тайлах тухай бодол сэтгэлд нь улам бүр ойрхон эргэлдэх болсныг хуваалцсан байна.
Дюрант “Миний орон зай биш болох тэр цаг ирнэ, бид тэр цэг рүү алхам алхмаар ойртсоор байна. Улирал дуусч байгаа энэ үед үүнийг бодох нь үнэхээр хачирхалтай мэдрэмж төрүүлдэг” хэмээн өгүүлжээ. Тэрээр найман настайгаасаа хойш амьдралынхаа хором бүрийг сагсан бөмбөгт зориулж ирсэн тул талбайгаа орхих нь түүний хувьд амьдралын маш том шилжилт, сорилт болно гэдгийг ч нуугаагүй юм.
Хэдийгээр 37 настай ч Дюрант энэ улиралд дунджаар 25.7 оноо, 5.5 самбараас бөмбөг авалт гүйцэтгэж, талбайгаас 51.7 хувьтай довтолж байгаа нь гайхалтай үзүүлэлт юм. Саяхан тэрээр домогт Майкл Жорданыг гүйцэж, бүх цаг үеийн мэргэн буучдын жагсаалтын 5-р байранд бичигдсэн түүхэн амжилтын эзэн болсон билээ.
“Рокетс”-ын шүтэн бишрэгчид түүнийг ахиад хэдэн жил тоглоно гэж найдаж байгаа ч Дюрант “Одоо надад хэдхэн жил үлдсэн гэдгээ мэдэж байна. Тиймээс дараагийн шатандаа бэлдэж эхлэх хэрэгтэй” хэмээн онцолжээ. Одоогийн байдлаар түүний гол зорилго бол барууны бүсийн дөрөвдүгээр байранд бичигдэж буй залуу бүрэлдэхүүнтэй “Хьюстон Рокетс” багийг плей-оффт амжилтад хүргэхэд оршиж байна.
Дэлхийн сагсан бөмбөгийн нэгэн үеийн тод төлөөлөгч ийнхүү карьерынхаа сүүлийн бүлгийг бичиж эхэлсэн нь спорт сонирхогчдын хувьд гунигтай ч, хүндэтгэлтэй хүлээн авах мэдээ болж байна.
