НБА-ийн түүхэн дэх бүх цаг үеийн агуу тоглогч (GOAT) хэн бэ гэх маргаан Майкл Жордан болон Леброн Жэймс нарын дунд эцэс төгсгөлгүй үргэлжилдэг. Тэгвэл нэрт шинжээч Колин Коверд энэхүү харьцуулалтад “аура” буюу тамирчны бие хүнээс ялгарах онцгой хүч, нөлөөллийн талаар сонирхолтой дүгнэлт хийлээ.
Ковердын үзэж буйгаар Майкл Жорданыг илүү агуу, “бурханлиг” мэт харагдуулдаг гол хүчин зүйл нь түүний тоглож байсан үед олон нийтийн сүлжээ байгаагүй явдал гэнэ. Тухайн үед шүтэн бишрэгчид нь Жорданыг зөвхөн талбай дээрх гайхамшигт тоглолт, цөөн хэдэн сурталчилгаа болон загварын чиг хандлагаар нь л төсөөлдөг байв. Түүний хувийн амьдрал нууцлаг байсан нь түүнийг тойрсон “аура”-г улам хүчирхэгжүүлж, хүмүүсийн дунд домог мэт яригдах үндэс болжээ.
Харин Леброн Жэймсийн хувьд мэдээллийн эрин үед тоглож байгаа нь түүний “онцгой” байх мэдрэмжийг тодорхой хэмжээгээр бууруулсан гэж Коверд тайлбарлаж байна. Өнөөдөр Леброны хийж буй алхам бүр, жиргээ, инстаграм стори, бэлтгэл сургуулилалт, тэр байтугай юу идэж байгаа нь хүртэл олон нийтэд ил тод байна. Энэхүү хэт их хүртээмжтэй байдал нь тамирчныг “хүнлэг” болгож харагдуулдаг ч, Жорданд байсан тэрхүү нууцлаг, хүршгүй мэт агуу чанарыг бүдгэрүүлдэг аж.
Хэдийгээр статистик үзүүлэлт болон амжилтын хувьд хоёр тамирчин хоёулаа оргилд байгаа ч, Ковердын дүгнэлт сагсан бөмбөг сонирхогчдод агуу байдлыг арай өөр өнцгөөс харах боломж олгож байна. Жорданы “аура” бол зөвхөн түүний ур чадвар бус, тухайн цаг үеийнх нь бүтээсэн нууцлаг түүх юм.
