Австралийн эрдэмтэд эрчим хүч хадгалах салбарт түүхэн нээлт хийж, дэлхийн хамгийн анхны “квант зай хураагуур”-ыг амжилттай бүтээснээ зарлалаа. Энэхүү технологи нь ирээдүйд гар утаснаас эхлээд цахилгаан автомашин хүртэлх бүх төрлийн төхөөрөмжийг хэдхэн секундийн дотор цэнэглэх боломжийг нээж байна.
CSIRO, Мельбурний их сургууль болон RMIT-ийн судлаачдын хамтран гүйцэтгэсэн уг төслийн үр дүн шинжлэх ухааны нэр хүндтэй “Nature Light: Science & Applications” сэтгүүлд нийтлэгджээ. Уламжлалт зай хураагуурууд химийн урвалд тулгуурладаг бол квант зай хураагуур нь квант механикийн нарийн зүй тогтлыг ашиглан эрчим хүчийг хадгалж, дамжуулдаг байна.
Уг технологийн хамгийн гайхалтай давуу тал нь “супер шингээлт” (superabsorption) хэмээх үзэгдэл юм. Энэ нь гэрлийн энергийг нэгэн зэрэг асар их хэмжээгээр сорж авах замаар зайг маш хурдтай цэнэглэх боломжийг олгодог.
“Квант зай хураагуур нь ердийн технологиос ялгаатай нь хэмжээ нь томрох тусам цэнэглэх хурд нь улам нэмэгддэг өвөрмөц шинж чанартай. Энэ бол квант физикийн хамгийн сонирхолтой бөгөөд ирээдүйтэй үзэгдэл юм” хэмээн төслийн удирдагч, доктор Жэймс Куач онцолжээ.
Мельбурний их сургуулийн Хурдацтай лазерын лабораторид хийсэн туршилтаар уг зай хураагуур нь өрөөний температурт тогтвортой ажиллаж, өндөр хурдаар цэнэглэгдэх боломжтойг баталгаажуулсан байна. Энэ нь квант технологийг лабораторийн орчноос хальж, бодит амьдрал дээр, ахуйн хэрэглээнд нэвтрүүлэх суурийг тавьж буй хэрэг юм.
Одоогоор судалгааны баг квант зай хураагуурын эрчим хүч хадгалах хугацааг уртасгах, цэнэг алдалтыг багасгах тал дээр төвлөрөн ажиллаж байна. Хэрэв энэхүү технологи бүрэн нэвтэрвэл бидний мэдэх эрчим хүчний систем үндсээрээ өөрчлөгдөх юм.
