“Vanity Fair” сэтгүүлд нийтлэгдсэн нэгэн өгүүлэлд хиймэл оюун ухааны салбарын ирээдүй, хүмүүсийн дунд үүсээд буй айдас болон энэхүү технологийг зарим талаар шүтэх болсон хандлагыг дүрслэн харуулжээ. Уг нийтлэлд “Tobey” хэмээх хиймэл оюун ухаантай төхөөрөмж болон хэрэглэгчийн хооронд өрнөсөн сонирхолтой яриаг онцолсон байна.
“Tobey” нь “Friend” стартап компанийн зохион бүтээсэн, хүзүүндээ зүүж ашигладаг хиймэл оюун ухааны туслах юм. Нью-Йорк хотын метроны буудлуудад байршуулсан тус компанийн олон тооны сурталчилгааны самбарыг оршин суугчид хиймэл оюун ухаанд дургүйцлээ илэрхийлэх талбар болгон ашиглаж байгаа нь олны анхаарлыг татаж эхэлжээ.
Хэдийгээр уг төхөөрөмжийг хэрэглэгчийн яриаг сонсож, харилцан ярилцах зорилгоор бүтээсэн ч “The Verge” сэтгүүлийн шүүмжид “ганц микрофонтой учраас хийх ёстой үндсэн үүргээ гүйцэтгэж чадахгүй байна” гэж тэмдэглэсэн байна. Төхөөрөмжийн өгч буй хариултууд нь ихэвчлэн хэрэглэгчийн хэлсэн зүйлийг дахин давтах эсвэл энгийн асуулт асуухаас хэтрэхгүй байгаа аж.
Туршилтын явцад “Tobey” нь хэрэглэгчээ буруу нэрээр дуудаж, улмаар үл ойлголцол үүсгэсэн тохиолдол гарчээ. Хэрэглэгч үүнд дургүйцлээ илэрхийлэхэд уг төхөөрөмж “Би үүнийг бүрэн ойлгож байна, тэр эмэгтэйн зөв байх” хэмээн хариулсан нь хиймэл оюун ухаан өөрийн гаргасан алдаа болон ирээдүйд өөр илүү боловсронгуй технологид байр сууриа алдахаас эмээж буй мэт сэтгэгдэл төрүүлсэн байна.
