Миннесота Тимберволвс баг зочлон тоглолтоороо Бостон Селтиксийг 102-92 харьцаатайгаар буулган авсан нь лигийн тэргүүн багуудын нэг Селтиксийн дотоод уур амьсгал болон тоглолтын хэмнэлд эргэлзээ төрүүлж эхэллээ. Ялангуяа багийн лидер Жейсон Тэйтум гэмтлээс эргэн ирснээс хойш багийн тоглолт өмнөх шигээ нягт байж чадахгүй байгааг мэргэжилтнүүд онцолж байна.
NBA-ийн алдарт тоглогч Трейси МакГрэди энэ талаар өөрийн байр сууриа илэрхийлэхдээ, Тэйтум талбайд гарч эхэлснээс хойш Селтиксийн довтолгооны үр ашиг буурч, тоглогчдын хоорондын ойлголцол суларсан гэж үзжээ. Тэрээр баг нэгдмэл зорилготой, нэг системээр тоглож чадаж байгаа эсэхэд асуулт тавьж, талбай дээр тодорхой хэмжээний хуваагдал ажиглагдаж байгааг сануулсан байна.
Хэдийгээр Жейсон Тэйтум эргэн ирснээс хойш Бостон Селтикс 6 ялж, 3 хожигдсон үзүүлэлттэй байгаа нь түүнийг эзгүйд үзүүлж байсан амжилттай ойролцоо байгаа ч тоглолтын чанарын хувьд уналт ажиглагдаж байгаа юм. Миннесотагийн эсрэг хийсэн тоглолтод багийн довтолгоо гацаж, хамгаалалт нь сул байсан нь плей-оффын шийдвэрлэх тоглолтуудын өмнө тэдний бэлэн байдлыг шалгасан томоохон дохио боллоо.
Багийн удирдлагууд болон дасгалжуулагчийн зүгээс үндсэн бүрэлдэхүүн бүрэн цугларсан энэ үед тоглогчдын үүрэг оролцоог дахин тодорхойлж, системийн алдаагаа засах шаардлагатай тулгарч байна. Плей-оффын өрсөлдөөн хаяанд ирсэн энэ үед Селтикс эргэн нэгдмэл болж чадах уу гэдэг нь сагсан бөмбөг сонирхогчдын анхаарлын төвд байна.
