Германы мэдээллийн технологийн мэргэжилтэн, “этик хакер” гэгддэг Лилит Виттман Мальтагийн тоглоомын газрын (MGA) дотоод мэдээллийн санд нэвтэрч, нууцлалтай мэдээллийг олж авсан хэргийн хариуцлагыг хүлээж байгаагаа зарлалаа. Тэрээр Европын хамгийн том хакеруудын холбоо болох “Chaos Computer Club”-ийн гишүүн бөгөөд олж авсан мэдээллээ хэвлэл мэдээлэл болон холбогдох эрх бүхий байгууллагуудтай аль хэдийн хуваалцсан гэдгээ мэдэгдсэн байна.
Лилит Виттман өөрийн X (хуучнаар Twitter) хуудсаараа дамжуулан энэхүү үйлдлийнхээ зорилгыг тайлбарлахдаа, MGA-ийн үйл ажиллагааны ард нуугдаж буй зохион байгуулалттай гэмт хэргийг дэмжих схемүүдийг илчлэх хүсэлтэй байсан гэжээ. Түүний үзэж буйгаар тус байгууллага нь олон нийтийн үйлчилгээ үзүүлэгч нэрийн дор хууль бус үйл ажиллагааг халхавчилж байгаа аж. Хэрэв Мальтагийн талаас түүний эсрэг хуулийн хатуу арга хэмжээ авч, Германаас шилжүүлэн авахыг оролдвол олж авсан бүх баримтуудаа шууд нийтэд дэлгэнэ гэдгээ анхааруулсан байна.
Нөгөө талаас, Мальтагийн тоглоомын газар (MGA) энэхүү үйлдлийг эрс буруушааж, Виттманыг зөвшөөрөлгүйгээр системд халдсан гэмт хэрэгтэн хэмээн үзэж байна. Тус байгууллагаас гаргасан мэдэгдэлдээ зохион байгуулалттай гэмт хэргийг дэмжиж байгаа гэх хардлагыг эрс няцаагаад, MGA нь олон улсын стандарт, хатуу хяналтын тогтолцооны дагуу бие даасан, хариуцлагатай үйл ажиллагаа явуулдаг болохыг онцлон тэмдэглэжээ.
Мальта улс нь дэлхийн онлайн мөрийтэй тоглоомын гол зангилаа цэгүүдийн нэг бөгөөд 300 гаруй компанид тусгай зөвшөөрөл олгодог байна. Хэдийгээр тус улс 2023 онд мөнгө угаахтай тэмцэх олон улсын “саарал жагсаалт”-аас гарсан ч Герман, Австри зэрэг Европын орнууд Мальтагийн хууль тогтоомж нь бусад улсын хуулийг зөрчиж буй компаниудыг хамгаалж байна хэмээн шүүмжилсээр байгаа юм. Энэхүү мэдээлэл алдагдсан явдал нь тус улсын тоглоомын салбарын нэр хүнд болон аюулгүй байдалд дахин нэг сорилт болж байна.
