Олон жилийн турш эрүүл мэндийн гол үзүүлэлт болсоор ирсэн Биеийн жингийн индекс (BMI) нь бодит байдал дээр хүний биеийн өөх тосны хэмжээг нарийн тогтоож чадахгүй байгааг шинэ судалгаа анхаарууллаа. Италийн болон Бейрутын их сургуулийн судлаачид 1351 насанд хүрэгчдийг хамруулан судалж, BMI-ийн үзүүлэлтийг алтан стандарт болох DXA (рентген шинжилгээ) аппаратын дүнтэй харьцуулжээ.
Судалгааны үр дүнгээр BMI-ийн ангиллаар таргалалттай гэж гарсан хүмүүсийн 34 хувь нь DXA-аар хэмжихэд хэт таргалалттай гэх ангилалд багтаж байв. Хамгийн сонирхолтой нь, BMI-ээр хэт таргалалттай гэж ангилагдсан хүмүүсийн 53 хувь нь бодит байдал дээр эрүүл жинтэй буюу булчингийн масс өндөртэй хүмүүс байсан нь тогтоогджээ. Энэ нь BMI-ийн аргаар хүнийг оношлоход тал гаруй хувьд нь алдаа гарч болохыг харуулж байна.
Модена, Реггио Эмилиягийн их сургуулийн профессор Марван Эл Гоч хэлэхдээ, BMI нь зөвхөн өндөр болон жингийн харьцааг хэмждэг болохоос биш биеийн өөх тосны тархалт, булчингийн массыг харгалздаггүй тул ийм зөрүү гардаг байна. Энэхүү алдаатай оношилгоо нь эрүүл мэндийн даатгал, эмчилгээний төлөвлөгөө болон хувь хүний сэтгэл зүйд сөргөөр нөлөөлөх эрсдэлтэй юм.
Судлаачид зөвхөн BMI-д найдахын оронд бүсэлхийн тойргийг хэмжих эсвэл арьсны нугалааг шалгах зэрэг биеийн бүтцийг нарийвчлан тогтоох аргуудыг хавсаргахыг зөвлөж байна. Энэхүү судалгааны үр дүнг ирэх тавдугаар сард Истанбул хотод болох Европын таргалалтын эсрэг чуулга уулзалтаар албан ёсоор танилцуулж, “Nutrients” сэтгүүлд нийтлэхээр болжээ.
